Конечно одблокирана сметката на Општата болница во Охрид
Иако сè уште има долгови охридската Општа болница конечно ја одблокира својата сметка. Тоа е добра вест за охриѓани, но и пред туристичката сезона, бидејќи се работи за здравствена институција во којашто преку летото се лекуваат и поголем број странски туристи. Охрабрува и веста дека започна да се решава проблемот со недостиг на лекари специјалисти...
По скоро две години е одблокирана сметката на Општата болница во Охрид што е резултат на домаќинското работење и финансиската поддршка од Фондот за здравство и Владата. Тоа ќе овозможи нормално функционирање на оваа здравствена институција која и во изминатиот период работеше без застој благодарение на трпеливоста на добавувачите.
„Долгот е намален за околу 1 милион евра и ќе се потрудиме во периодот што претстои да се сервисира и останатиот дел. Ова е многу важно, бидејќи охридската болница е регионален центар, каде преку летото бројот на пациенти се зголемува за една третина, бидејќи Охрид е туристички центар и во него престојуваат голем број домашни и странски туристи на кои мораме да пружиме квалитетни здравствени услуги“, изјави Асен Шајн, директор на Општа болница – Охрид.
Во изминатите 8 месеци во болницата се вработени 32 лица од кои најголемиот број се медицински кадар, меѓу кои се 10 лекари, што треба да придонесе за зголемување на квалитетот на услугите.
„После подолг временски период од Општа болница Охрид се испратија 9 нови доктори на специјализација. Со ова почнуваме да правиме планско пополнување на одделенијата со дефицитарни специјалисти доктори, како што е педијатрија, анестезиологија, инфектологија и ќе продолжиме со праќање на нови доктори на специјализација“, истакна Шајн.
Со оглед на тоа што во изминатите децении во болницата имаше недостиг од доктори специјалисти охрабрува најавата дека до крајот на годинава на специјализација ќе бидат упатени уште 10 млади лекари.
Извор: www.mrt.com.mk Сашо Нелоски
Публицитет.мк