Култура
Министерката за култура, Бисера Костадиновска-Стојчевска, присуствува на 45-тата сесија на Комитетот за светско наследство на УНЕСКО што се одржува во Ријад, Кралство Саудиска Арабија, на која вчера беше соопштена Одлуката на Комитетот дека Охридскиот Регион, со својата исклучителна универзална вредност, останува на листата на светско наследство. Во македонската делегација во Ријад се и министерката за животна средина и просторно планирање, Каја Шукова, државниот секретар во Министерството за надворешни работи, Филип Тосевски, како и директорот на Управата за заштита на културното наследство, Зоран Павлов.
Наградите „Златен венец“, „Браќа Миладиновци“ и „Мостови на Струга“ синоќа беа врачени на Мостот на поезијата во Струга со што свечено се затвори 62. издание на меѓународниот поетски фестивал „Струшки вечери на поезијата“.
Изложбата со ексклузивните наоди од некрополата Требенеште, која во 2019 година, во рамките на соработката на музеите на Северна Македонија, Србија и на Бугарија, беше поставена во Скопје, како што беше најавено тогаш, го продолжува својот пат и ќе биде претставена пред бугарската јавност во Националниот археолошки институт со музеј при Бугарската академија на науките во Софија.
Со настанот „OH READ #2 (дијалог низ поезија)“, вчера во Охрид беше затворена 35. Поетска ноќ во Велестово. Во рамки на овој настан поетите учесници: Албан Туфа (Албанија), Павлина Атанасова (Македонија), Марија Костиќ (Србија) и Шпетим Селмани (Косово), најпрвo во гимназијата „Св. Климент Охридски“ одржаа работилница за креативно пишување и дијалог преку поетски препев, наменета за млади, а подоцна се одржа и интернационално поетско читање во кафе и бар „Шила“ во Охрид.
Импресивни, возбудливи и блескави доживувања на врвните концерти и театарски претстави кои ги понудивме на ова 63. фестивалско издание на автентичните локалитети, Античкиот театар, црквата Св.Софија, предворјето на Св. Софија, Долни Сарај, и Центарот за култура се сведоштво дека фестивалот „Охридско лето“ е специфичен и посебен, препознатлив и единствен на нашите простори, како еден од најистакнатите културни настани во Европа и светот. Фестивал кој е меѓу петте најдобри во Европската асоцијација на фестивали.
Драмскиот репертоар на 63-тото „Охридско лето“ вечерва ќе ја донесе театарската претстава „Декамерон“ од Џовани Бокачо, во режија на Мартин Кочовски, а во изведба на НУЦК „Марко Цепенков“ -Театар „Војдан Чернодрински“ од Прилеп. Претставата ќе се одигра на „Долни Сарај“ со почеток од 21 часот.
Музичката програма на 63-тото издание на фестивалот „Охридско лето“ вечерва од 21 часот во црквата „Света Софија“ продолжува со концерт на триото „Аура“.
Драмскиот репертоар на фестивалот „Охридско лето“ продолжува вечерва со театарската претстава „Сергеј е многу глупав“ од Димитри Данилов, во режија на Дејана Николовска, а во изведба на НУЦК „Григор Прличев“ – Народен театар Охрид.
Со традиционалната португалска фадо музика и прекрасниот вокал Жуана Амендоира вечерва на сцената „Долни Сарај“ од 21 часот ќе биде одбележан 63-тиот роденден на фестивалот „Охридско лето“. Португалската уметница Жуана Амендоира ќе настапи во придружба на Педро Амендоира на португалска гитара и Жуао Фелипе на фадо гитара.
Традиционалната Италијанска вечер на фестивалот „Охридско лето“ вечерва нуди концерт на извонредните уметници, тенорот Џани Лечезе и пијанистот Екланд Хаса кои ќе настапат под акустичните сводови на црквата „Света Софија“ во стандардниот фестивалски термин, од 21 часот.
