Со концерт на гудачкиот ансамбл „Антео“, во црквата Света Софија во Охрид, синоќа отпочна дводневното одбележување на 24 Мај - Денот на сесловенските просветители, Светите Кирил и Методиј.

 

Ансамблот „Антео”, изведува музика на светот и ја инкорпорира во македонското звучно милје во кое се вткаени традицијата и современоста. 

 

 

Музика која е авторска, но која во себе содржи влијанија од музиката родена под поднебјата на Франција, Шпанија, Балканот - или спој од западните класични вредности во фузија со богатиот фолклор на различните народи кои живеат и творат на македонската почва. 

 

 

Во пресрет на Денот, Владата годинава организира дводневно свечено одбележување на државниот празник, под мотото „Писмото е нашиот универзум“. Свеченото одбележување на празникот започна во Охрид - колевката на словенската писменост.

„Оддаваме должна почит на непроценливата просветителска мисија на Светите Кирил и Методиј, со која ги поставија основите на сесловенската писменост и која е инспирација сите следни генерации. Нивното дело живее и денес. Македонскиот стандарден јазик, нашиот официјален јазик, денес е целосно заштитен, признат и е рамноправно прифатен меѓу официјалните јазици и во ОН и во Европската Унија и како таков тој е признат и почитуван во светот, на што сме особено горди. Денес, како резултат на тешките, но храбри одлуки кои ги донесовме, вратите се ширум отворени и за активна промоција, но и за развој на македонскиот јазик и култура“, посочуваат од Владата.

По повод државниот празник, денеска во Охрид ќе се одржи панел-дискусија „Македонскиот јазик во словенскиот свет" на која воведен збор ќе има премиерот Ковачевски, по што ќе се положи цвеќе пред споменикот на светите Кирил и Методиј. Напладне во Плаошник ќе се одржи централната свеченост на која обраќање ќе има премиерот Ковачевски.

Овој голем ден се одбележува и слави повеќе од век и половина во словенскиот свет, како ден на културата и просветата.

 

Публицитет.мк