Денес во Охрид, започнува дваесет и третото издание на Меѓународниот натпревар на млади музичари „Охридски бисери“ 2024. Во наредните денови од 15 до 19 јуни, деведесетина млади уметници од осумнаесет држави ќе се натпреваруваат во дисциплините виолина, пијано и камерна музика. Младите музичари од Србија, Бугарија, Грција, Косово, Хрватска, Словенија, Албанија, Црна Гора, Германија, Турција, Естонија, Холандија, Иран, Кина, Азербеџан, СAД, Австралија и Македонија, ќе настапуваат во акустичниот амбиент на црквата Св. Софија. Натпреварот е отворен за публиката и туристите во Охрид. Стручната комисија е составена од десет членови, врвни уметници и педагози по виолина и пијано од повеќе европски престижни музички академии како и од Факултетот за музичка уметност од Скопје. Тоа се: пијанистите Александар Сердар од Србија, Барбара Шчепанска од Германија, Есер Билгеман од Турција, Катарина Крпан од Хрватска и Ана Гацева од Македонија, како и виолинистите: Јулија Беринскаја од Италија, Адам Вагнер од Полска, Мина Менделсон од Србија, Хана Мелник од Австрија и Љубиша Кировски Македонија.
„Охридски бисери“ е првиот организиран меѓународен натпревар во областа на класичната музика во Македонија, кој од 2002 година до денес поставува високи стандарди во однос на програмскиот концепт и строгата селекција на наградени учесници па така привлекува квалитетни млади уметници од целиот свет. Најуспешните натпреварувачи и годинава ќе имаат можност да освојат некоја од вредните награди: парични награди во износ од 2000, 1500 и 1000 евра за највисоко рангираните, награди на Фондацијата „Зографски“, здруженијата СОКОМ и СМУМ. Општина Охрид на лауреатот, носител на наградата Гран при му доделува ракотворба филигрански накит, а организаторот на натпреварот вреден накит – охридски бисери. Посебно значајна е и наградата на европската асоцојација на музички натпревари ЕМСИ, што на добитникот му овозможува годишна промоција на веб страната, учества на мастеркласи и концерти во повеќе европски градови. „Охридски бисери“ е единствен меѓународен натпревар од нашата земја, член на ЕМСИ од 2005 година, во која членуваат педесетина други натпревари од 30 европски земји и токму членувањето во ова здружение го издвојува натпреварот „Охридски бисери“ во однос на бројни други натпревари кои се одржуваат во нашата земја и во регионот.
На свеченото отворање во црквата Св. Софија, вечерва во црквата Св. Софија во 21.00 часот концерт ќе одржат дел од членовите на стручното жири: виолинистот Љубиша Кировски и пијанистите Катарина Крпан и Александар Сердар.
Натпреварот „Охридски бисери“ се одржува под покровителство на Министерството за култура и Градоначалникот на општина Охрид.
Викица Костоска – Пенева
Публицитет.мк
