„Неразбрана цивилизација“ од бугарскиот автор Добри Војников е најновиот проект што го подготвува Народниот Театар од Охрид. Актерите користејќи ја комедијата на сцената ќе можат да изговорат многу вистини, а пред сè, што мисли обичниот човек за европеизацијата…
„Неразбрана цивилизација“ од бугарскиот автор Добри Војников, којшто текстот го напишал кон средината на 19-ти век, е најновиот проект што го подготвува Народниот Театар од Охрид. Според зборовите на режисерката, Софија Ристевска Петрушева, претставата како жанр е чиста комедија, полна со иронија, сатира и гротеска, која и по повеќе од век и половина го опишува нашето современо време, проблемите со кои се соочуваме како цивилизација поради глобализацијата, решенијата коишто ни се наметнуваат од Европа и што обичниот човек подразбира под тоа европеизирање. Поради породилни отсуства на женскиот дел од екипата, претставата ќе ја играат само актери.
„Комедијата доби уште повеќе на сила и моќ, затоа што неколку мажи глумат жени, така што целиот тој момент на фалшива цивилизација и на тоа како ние живееме во овие услови на некаква вештачка глобализација, кога глобалното доминира, а личното и индивидуалното уште повеќе се потиснува со фактот што сите колеги се мажи“, вели Софија Ристевска Петрушева-режисер на претставата.
Дел од актерите коишто играат машка и женска улога, велат дека за нив ова ново искуство е корисно.
„Интересно е тоа што играме по повеќе ролји, неколку актери играат по повеќе ролји. На пример јас играм и една машка и една женска ролја којашто е надвор од хабитусот, на мојот личен хабитус, но е уште поголем предизвик да се изработи онака како што режисерот го замислил тоа“, рече актерот Филип Кипровски.
Актерската екипа очекува публиката со раширени раце да ја прифати оваа претстава, бидејќи комедијата е добро познат јазик на којшто зборува Охридскиот театар.
Извор: www.mrt.com.mk Сашо Нелоски
Публицитет.мк