Река од спомени, многу насмевки и некоја притаена солза, ама радосница може да се забележи и на фотографиите, дека по толку години повторно се најголемиот дел од нив заедно.
Синоќа во пица – ресторанoт DI ANGOLO во срцето на Охрид се собраа некогашните ученици од I-1 од ОУ „Христо Узунов“ кои во прво одделение стапнаа учебната 1980/81 година а нивна учителка и истовремено втора мајка им беше Мирјана Трајкоска.
Идејата дошла сосема спонтано. Еден нивни соученик долго размислувал за можна заедничка средба на сите од прво. Преку социјалните мрежи тој формирал група и преку лични контакти еден на друг трагале по своите соученици.
И кога се собрала критична маса од луѓе закажале средба во Охрид. За жал неколкумина поради работните обврски во странство не беа во можност да присуствуваат на генерациската средба ама преку видео повици си разменија честитки и поздрави. Дел од нив поради болест и покрај големата желба мораа да останат дома.
Букети со најубави цвеќиња и прекрасни зборови беа упатени до нивната учителка Мирјана, која беше пресреќна и ги израдува сите со своето присуство и со љубов одново ги прегрна како свои деца. Им одржа нова куса лекција за животот со порака секогаш да се силни и да се борат за вистината и да бидат хумани и чесни.
И учениците и’ возвратија со љубов и текст од кој зрачи бескрајна почит за научените први букви и бројки а најмногу за воспитанието кое од нив направи луѓе , чесни, вредни и почитувани.
Дружбата траеше долго во ноќта, се редеа анегдоти и шеги од училишните клупи а сите заминаа со ветувањето дека в година пак ќе се соберат со желба да се побројни, здрави и живи.
Публицитет.мк
