На Свечениот концерт што се одржа на 17 јуни, во Свечената сала на Општина Охрид, настапија финалистите во дисциплините флејта, кларинет, труба, хорна и камерна музика во различни возрасни категории што годинава беа застапени на натпреварот. „Охридски бисери“ е веќе познат и афирмиран натпревар во земјава, поширокиот регион, но и во цела Европа по високиот квалитет на организација, особено талентирани и подготвени млади учесници, врвни уметници и педагози што како членови на стручното жири ги оценуваат изведбите и секако по вредните награди.
И годинава, како и во претходните изданија на натпреварот, публиката во салата на Општина Охрид уживаше во виртуозните настапи на младите уметници на Финалниот концерт. Десетчленото интернационално жири едногласно одлучи наградата „Гран при“, парична награда во износ од 1500 евра и вреден накит охридски бисер да ја освои младиот уметник Виктор Теодосиев од Бугарија, во дисциплината хорна. Второ место во генерален пласман и парична награда од 1000 евра, освои Томаш Гжебјен од Полска во дисциплината кларинет, а овој млад уметник ја освои и специјалната награда на ЕМСИ (европска асоцојација на музички натпревари во која „Охридски бисери“ е активен член од 2005 година). Таа награда на добитникот ќе му овозможи едногодишна промоција и развој на концертната кариера во повеќе европски музички центри и стручно усовршување со еминентни педагози. Трето место и парична награда од 500 евра освои флејтистката Ирена Паниќ од Србија. Главните награди ги врачи претседателот на натпреварот Ѓорге Улишев.
За најуспешно пласирани претставници од Македонија на „Охридски бисери 2023“ беа прогласени: Мерт Рустемов – кларинет, Стефан Трајаноски – саксофон, Мевлјуд Асаноски – кларинет и пијано триото во состав: Мевлјуд Асаноски, Ѓорѓи Димовски и Арсениј Ангелески. Младите уметници како награда од Сојузот на музичките уметници на Македонија ќе имаат можност да настапат на концерт во рамки на програмата на Фестивалот „Златна лира“.
Парични награди во износ од 100 евра што ги доделува Сојузот на композиторите на Македонија освоија германската флејтистка Лина Герштенауер за изведба на композицијата „Дојранка“ од Трајко Прокопиев и Петар Костадиновски на труба, од Македонија за изведба на композицијата „Тешкото“ од Благоја Ангеловски.
Специјалната награда на Фондацијата „Зографски“ ја освои младата флејтиска Кристина Љушкоска од Охрид, за изведба на композицијата „Сиринкс“ од композиторот Томислав Зографски.
Специјалните награди на добитниците им ги врачи членот на Организацискиот одбор на „Охридски бисери“ и член на Бордот на ЕМСИ, композиторот и пијано педагог Борис Светиев.
Во соработка со професорите, членови на жири, Детлеф Бенсман – саксофон и Петер Арнолд – хорна, двајцата од Германија, беа доделени специјална парична награда од германската фондација „Урсула Мамлок“ на македонскиот кларинетист Мевлјуд Асаноски (300 евра) и специјална награда од германскиот бренд за изработка на музички инструменти „Гебр. Александер“ за најдобра изведба на дело од Моцарт, што ја освоија Виктор Теодосиев (500 евра) и Цветелина Занкова (300 евра) од Бугарија.
На крајот на натпреварот присутните и добитниците на наградите ги поздрави заменик градоначалникот на Општина Охрид, г-дин Перчо Божиновски, кој на победникот на натпреварот му врачи вреден накит – филигран. Покрај поддршката од Општина Охрид, натпреварот „Охридски бисери“ се реализира и со поддршка на Министерството за култура на Република Северна Македонија и Основното Музичко Училиште „Методи Патче“ од Охрид.
Викица Костоска Пенева – музиколог и
член на Организациски одбор на „Охридски бисери“
Публицитет.мк
