Македонскиот јазик не е нов како што некои сакаат да прикажат. Тој се зборува со векови и за него одамна зборувале и пишувале слависти од други држави, иако до втората светска војна немало македонска држава со организирано образование. Ова го вели професор доктор Олга Мишевска – Томиќ, во чии раце случајно се нашол ракопис од средината на 16 век, напишан на македонски јазик.
Во 1940-та година кардиналот Џовани Меркати од Ватиканската библиотека, во фолиите на стар грчки ракопис пронашол македонски текст напишан со грчки букви кој датира од средината на 16-ти век. Го замолил италијанскиот славист Чиро Џанели да го прегледа, а по Втората светска војна во работата му се придружил францускиот славист Андре Вајант.
Како резултат на нивната работа, во 1958-та година Институтот за проучување на словенските јазици од Париз ја објавува книгата „Македонската лексика од 16-ти век“. Благодарение на Тобијас Шир, кој ја пронашол и купил оваа книга во париска антикварница стигнала во рацете на неговата колешка проф. д-р Олга Мишевска Томиќ, која потекнува од Охрид.
„Многу е значајно дека двајца лингвисти коишто не се Македонци ја напишале таа книга и дека сега, кога „македонски“ толку многу се оспорува, можеме да потврдиме дека уште во 16-ти век знаеле за македонски јазик“, изјави проф. д-р Олга Мишевска – Томиќ, професор во пензија.
89-годишната професорка Олга Мишевска – Томиќ вели дека текстот, најверојатно го напишал образуван Грк кој добро го познавал македонскиот јазик, користејќи го костурскиот дијалект.
„Јас кога го споредив со современиот костурски јазик којшто го проучувале наши лингвисти, видов дека многу малку се разликува од тој, скоро ништо, а малку се разликува и од македонскиот современ јазик“, дополни Мишевска – Томиќ.
Македонскиот јазик за којшто станува збор бил напишан повеќе од два века пред печатењето на македонските зборови од четворојазичниот речник од Даниел Москополец и повеќе од четири века пред да се печатат првите студии за македонските дијалекти од Галичник, Бобошница, Сухо и Костур.
Сашо Нелоски – www.mrt.com.mk
Публицитет.мк
