Најатрактивниот простор за фотографирање или да се види во полн сјај стариот дел на Охрид, е малото пристаниште. Особено во текот на летото оваа локација е магнет за големиот број туристи, но и за охриѓани кои тука се капат, меѓутоа во последната деценија престојот на овој простор е ризичен, бидејќи старата конструкција е руинирана и постојано во езерото се одронуваат поголеми камења. Експертите и граѓаните бараат реконструкција и ревитализација на пристаништето за да се избегнат било какви несреќи …
Малото пристаниште како што го нарекуваат охриѓани е изградено кон крајот на 50-тите години од минатиот век како дел од проектот на тогаш најатрактивниот хотел „палас“ и оттогаш до денес е една од најпосетуваните локации во градот.
Овој простор нуди можеби најубава панорама на Охрид од езерото, меѓутоа од друга страна сите посетители што доаѓаат овде се изложени на опасност, затоа што тој се распаѓа и е полн со пукнатини, што значи дека што поскоро треба да се работи на негова санација.
Според експертите од безбедносен аспект овој објект е опасен за луѓето.
„Ова е една конструкција да кажеме, рамка од колци којашто внатре е полнета со камења, кршен камен, а сега со тек на време, нормално условите, вода, ветер и т.н. си го направиле своето“, изјави Иво Лазароски-архитект.
Граѓаните го делат ставот на експертите и очекуваат санација на пристаништето.
„Треба да се направи, некој треба. Градоначалникот, мислам кои се одговорни за оваа работа да се направи. Се гледа дека е руиниран“.
„Треба да се поправи, да се цементира нешто затоа што вистина е упропастено, а тука доаѓаат многу туристи, доаѓаат и млади и постари да се сликаат“.
„Порано беше овде со штици, 60-тите години. Овде за капење имаше платформа со штици широка и тука одевме на платформата, лежевме и се капевме“.
Иако имаше проекти за комерцијализација на овој простор Лазароски смета дека тој треба да остане јавен, без да се градат кафулиња или ресторани.
„Некакви интервенции волуменски тука би нарушиле да кажеме визура од кејот, од променадата кон езерото. Значи битна е визурата од пристаништето кон стариот град, но битна е и од променадата кон езерото“, додава Иво Лазароски-архитект.
Сепак според него во моментов е најважно пристаништето да се санира, бидејќи никој не знае колкав е обемот на оштетувањата и колку тој статички е сигурен и дали во секој момент може да се урне.
Извор: МРТ
Сашо Нелоски
Публицитет
