По успешните промоции на монографијата за живата охридска ликовна легенда Јордан Манасијески во МАНУ во Скопје и во Културниот центар во Битола, утре – сабота во организација на Општина Охрид монографијата, ќе биде претставена и во Охрид, а уметникот ќе одбележи и 55 години творештво.
Монографијата е обемно и богато дело од 480 страници со тврд повез, со преку 300 репродукции во боја и текст на македонски и англиски јазик. Таа е од енциклопедиско значење и содржи критички осврти од повеќе историчари на уметност и тоа: Салваторе Русо – Италија, Рути Такер – САД, Санда Станачев Бајзек – Хрватска, Драган Јовановиќ Данилов – Србија, Бисера Валева – Бугарија и од македонските критичари и вљубеници во уметноста Никола Николовски, Зекман Ракиповски,писателите Киро Донев, Трајан Мартиновски и новинарот – публицист Милчо Јованоски.
Ова издание ја содржи целокупната досегашна уметничка кариера на Манасијески, во која се документирани настаните од домашната и меѓународната уметничка сцена: промоции, изложби, учества на Интернационални уметнички салони за модерна уметност и добиени награди. Дополнителен акцент е даден и на изработката на стриповите, кои опфаќаат еден голем дел од неговата уметничка кариера, а претставени се и мал дел од неговите преку 2.000 идејни дизајнерски решенија.
Изработката на монографијата за Манасијески траеше повеќе од 6 години. Техничката подготовка и графичкиот дизајн се на Боби Ќосев, а уредник на монографијата е неговиот долгогодишен промотор во светот Љупчо Жупан.
-Јордан Манасијески е автор, на некој начин гуру на ликовната уметност, не само во Македонија туку и пошироко. Неговата енергетска и антиматрикс ситуација не е само сликарство, туку е нешто повеќе. Тоа допрва ќе се открие. Тој е автор чии дела се еден вид отворање на оној невидлив свет на оние други слоеви, кои нашите сетила одбиваат да ги видат. Тој е автор на нашиот вистински дом, ќе рече промоторот, историчарот на уметност Владо Ѓорески – Рафик.
Со генерална поддршка од Лајонс клубовите од Охрид, настанот ќе има и хуманитарен карактер – продажба на графики. Дел од средствата кои ќе се соберат ќе бидат донирани за настраданите лица во Кочани. Со свои музички точки пред присутните ќе настапат познатиот гитарист Дамјан Пејчиноски и женскиот хор „Акордис“.
Свеченоста посветена на големиот охридски, македонски и светски уметник кој со своите дела и изложби ги живее миговите на слава и го задолжил својот роден град ќе се одржи во големата сала на Општина Охрид со почеток во 19 и 30 часот.
Публицитет.мк
