Во рамките на „Научно и уметничката визита 2015“ МАНУ во Куќата на Уранија во Охрид, утре – сабота, 25 јули од 20 часот ќе ја промовира книгата „Иконите на Дичо Зограф од црквите во Дебар и Мала Река“ од авторот д-р Сашо Цветкоски.
Во аудио-интервјуто за „Публицитет.мк“ промоторот на книгата, академик Цветан Грозданов ја открива врската помеѓу Дичо Зограф и преродбеникот и поет Григор Прличев и семејството Робевци.
За Прличев работел семејна икона,а за Робевци низа декоративни елементи за родната куќа, која денес е официјален Народен музеј на Охрид.
– Дичо Зограф е роден во селото Тресонче кај Дебар и науката го смета за преродбеник и најголем црковен сликар на Балканот во 19 век, кој зад себе оставил над 3000 дела, вели Грозданов.
Според Грозданов, Охрид и натаму останува најголемата ризница на македонската култура и уметност и неговите погледи одамна се свртени кон одбележувањето на 1100 годишнината од смртта на Свети Климент која треба да се одбележи идната година.
Како автор, неговото внимание е насочено кон уште едно дело посветено на црквата „Света Богородица Перивлепта“ , наскоро го очекува и третото издание на монографијата за Курбиново.
Од своите млади наследници, во истражувачкиот центар на МАНУ академик Грозданов бара постојано да се на терен и од изворот да ги „пијат“ најновите сознанија и факти.
Со клик на линкот подолу – слушнете го интервјуто со академик Грозданов во целост
Публицитет.мк/ Милчо Јованоски
