Со 72 гласа „за“ и со 37 гласа „против“, Собранието денеска го изгласа најбитниот финансиски документ за државата – Буџетот за 2017 година, кој тежи 3,35 милијарди евра, по околу еден час расправа и дискусија на само тројца пратеници.
По образложението на министерот за финансии, Кирил Миноски, дискутираа само пратениците Горан Сугарески од СДСМ, Крсто Мукоски од ВМРО-ДПМНЕ и Орхан Ибрами од ДПА.
Мукоски од ВМРО-ДПМНЕ даде поддршка за буџетот, според кој, како што рече, е во прилог на македонската економија и е за поддршка на странските и на домашните компании. Го истакна предвиденото зголемување на средствата за плати, пензии и за социјални трансфери и повика овој значаен документ за државата да се донесе со консензус.
Орхан Ибраими од ДПА изјави дека и овој буџет не се разликува од претходните осум и е на штета на Албанците, бидејќи постојат региони во Македонија каде што нема водовод и канализација, нема уредена патна инфраструктура, градинки, соодветни училишта.
Исто така, тој истакна дека во регионите каде што живеат мнозинство Албанци нема слободни економски зони, а во постојните нема вработено ниту еден Албанец.
Тој истакна дека како резултат на погрешните економски политики, од 2002 година досега се иселиле 300.000 Албанци.
Според пратеникот на СДСМ, Горан Сугарески, предлог-буџетот за 2017 година е една голема лага и на владејачката партија ѝ служи за да ги купи изборите, па затоа опозицијата нема да гласа ваков буџет.
Министерот за финансии Кирил Миноски во образложението пред пратениците истакна дека со предлог-буџетот за 2017 година, се проектира умерено забрзан економски пораст од 3,4 проценти.
Вкупните приходи се планирани на ниво од 187,6 милијарди денари, што е за 7,6 отсто повеќе во однос на 2016 година. Вкупните расходи се на ниво од 206,22 милијарди денари или за 4,5 проценти повеќе во однос на годинава. Буџетскиот дефицит е предвиден да биде 3 проценти од домашниот бруто-производ, односно 18,6 милијарди денари.
Извор: www.meta.mk
