Македонскиот сликар и хуманист Живко Поповски-Цветин, денеска во дворот на редакцијата на „Нова Македонија“ ќе ја врачи „Цветиновата награда за мир“, за 77-от роденден на првиот македонски дневен весник, кој над 35 години ја промовира и поддржува неговата мироносна мисија со „Цвеќето на мирот“.
Во текот на настанот ќе бидат изложени и артефакти од почетоците на „Нова Македонија“ – машина за пишување, фотоапарат, телефон, букви за висок печат, клишеа и слично.
Претходно по повод 24 октомври, Денот на ООН, беше доделена “Цветиновата награда за мир” , на 80 годишниот Димитар Илиевски од Скопје, интернационален шаховски мајстор.
Поранешниот нобеловски кандидат, уметникот и хуманист Живко Поповски – Цветин ја востанови оваа награда со цел да ги обележи луѓето кои со своето дело придонесуваат за мир и ширење на идејата за мир.
Прв добитник е Димитар Илиевски, шаховски мајстор кој одбележува 9 значајни јубилеи ( 65 години од освоено второ место на Сениорско првенство во Битола во шах; 60 години еден од најдобрите шахисти во Македонија, 50 години шаховско мајсторство, 50 години најдобар шахист на Македонија, 50 години 120-то место на светската рејтинг листа, 40 години од играната рекордна симултанка со 58 шахисти…).
Годинавасо порака ,,Со мудрост до /за мир”, Димитар ќе одигра уште 50 партии шах (досега одиграл 50) по повод 100 години од раѓањето на Блаже Конески. Инаку Конески бил и прв претседател на Шаховскиот сојуз на Македонија.
Цветин досега подарил над 60.000 свои слики и организирал над 300 изложби во Македонија и во светот (Шведска, Полска, Германија, Италија и Канада), како и во поранешните југословенски држави (Србија, БиХ, Хрватска, Црна Гора).
Во 2009 година тој беше номиниран за „Нобеловата награда за мир“ и се најде меѓу петте најсериозни кандидати од 20-те предложени. Во 2015 година, Цветин создаде слика од 1.001 метар.
Извор: Нова Македонија и КулАрт
Публцитет.мк
