По завчерашната успешна промоција во Битола, вчера и во Охрид во кафулето Аквариус, беше промовирана Збирката на поетски творби за деца на проектот Фестивал на поезија за деца, Стихо-фест „СТИХУВАЛКИ“ 2018.
Програмски уредници на литературната манифестација се проф. д-р Кристина Николовска и м-р Ели Маказлиева, како и 15 други нивни соработници коишто го поттикнаа и иницираа овој настан. Голема улога има и изфавачката куќа ЕДУКА МАК ДОО Скопје, која е всушност носител на целиот фестивал.
Фестивалот беше отворен со говор на водителката Александра Велинова, којашто накратко го претстави целиот настан и ги поздрави учесниците и жири комисијата, која ја сочинуваа Христо Петрески – долгогодишен автор и автор за деца и претседател на Собранието на Друштвото на писатели на Македонија, м-р Ели Маказлиева и проф. д-р Кристина Николоска, којашто поради оправдани причини не можеше да учествува на настанот.
Членовите на жири комисијата подетално го објаснаа овој проект, кој се појавил како идеја во недостатокот на литература (поезија) за деца и за тој да се реализира била потребна година. Секако секој проект содржи неколку фази па така и овој, меѓу кои, најпрво избирањето лого – кое е гасеница – симбол за Фестивалот, кој ќе прерасне во пеперутка со сите негови предности и ќе стане и меѓународно признат. Потоа, како втора фаза е распишувањето на конкурсот на кој се пријавиле 89 поети од Македонија, афирмирани и неафирмирани, помлади и постари. Жири комисијата од нив избрала 49 кои потоа ги објави во Збирката. Од тие, 25 од нив ќе се натпреваруваат за прво место – 150 евра и златна плакета, второ место – 100 евра и сребрена плакета и трето место – 50 евра и бронзена плакета. За таа цел, водителката и присутните писатели ги прочитаа нивните дела, а потоа на публиката им беа дадени ливчиња за да гласаат за нивната омилена песна. Како последна фаза беа посочени, секако, печатењето и промовирањето на овој проект, како и доделување на веќе напоменатите награди.
Атмосферата ја разубави и хрватскиот кант-автор Дамир Мараз кој отпеа неколку негови песни, а како дел од публиката беа и Полка Карајанова и писателот Видое Видически.
Со овој проект, исто така, им беше дадена можност на сите автори од Македонија, веќе познати или допрва откриени, да се пријават и нивната песна да се објави во Збирката. Како и да е, за едно нешто сите беа сложни – во еден свет каде технологијата станува најверен другар на малите деца, фали книгата и пишаниот збор. Особено во Македонија фалат млади писатели на поезија за деца, но со овој настан на еден посебен начин се поттикна таа потреба и се оддаде големо значење на македонскиот јазик и неговата употреба кај помладите генерации.
Дамјана Видическа, Публицитет.мк
