Филмот „Господ постои, името ѝ е Петрунија“ повторно ќе биде на кино репертоарот во НУ Центар за култура „Григор Прличев” – Охрид в петок, на 29 јануари со почеток во 18 часот.
Темата е несомнено интересна, а уште повеќе ветуваат и ликовите кои ја носат приказната, секако на чело со Петрунија, во улога на Зорица Нушева.
Петрунија има 32 години и е навработена историчарка која живее со мајка ѝ и татко ѝ. Живеат од социјална помош и од работата што повремено ја наоѓа мајка ѝ. Петрунија одбива да се вработи во текстилна фабрика. Таа одбива да ја прифати традиционалната улога што ѝ ја наметнува општеството. Упорна е и одлучна да дојде до заокружувањето на својата идеја, без оглед на околностите.
Режијата е на Теона Стругар Митевска, а во стоминутната драма играат: Зорица Нушева, Лабина Митевска, Петар Мирчевски, Виолета Шапковска, Симеон Мони Дамевски, Суад Беговски, Илија Волчески, Стефан Вујисиќ, Андријана Колевска и Владимир Тулиев.
Цената на билетот чини 100 денари, а филмот е наменет за публика над 16-годишна возраст. Кино-проекцијата ќе се прикажува согласно здравствените протоколи со ограничен број публика.
Публицитет.мк
