Вчера и наредниот петок во американските кино сали но и ширум светот,на кино репертоарот (се разбира онаму каде што се одржуваат кино престави) се најдоа и ќе се најдат неколку интересни филмски остварувања со кои во кратки црти ќе ве запознаеме во ова второ продолжение во кое говориме за филмските премиери во првиот месец од оваа нова 2019 филмска година.
СТАКЛО
Од вчера на кино репертоарот се наоѓа научно фантастичната драма со елементи на мистерија „ Стакло“ во режија на М.Најт Шамалан , индиски режисер кој направи успешна кариера во Холивуд. Негов бренд е филмот „ Шесто сетило“ од 1999 година кој ширум му ги отвори вратите на ветената земја. Сите негови филмови во себе содржат мистериозна нитка со која тој стана препознатлив кај љубителите на филмот. И неговите наредни филмови „ Знаци“, „ Село“ , „Нескршливиот“ па и неговиот најнов филм ја содржат таа препознатливост на неговото творештво.
Овојпат филмот говори за чуварот Дејвид Дан кој ги користи своите натприродни способности за да го следи Кевин Вендел Крамб, непредвидлив човек кој има дваесет и четири личности.
Во филмот актерската екипа ја предводи Брус Вилис со кого соработуваше во филмот „Шесто сетило“ а тука се уште и Џејмс МекАјвори, Семјуел Л. Џексон , Сара Пулсон, Ања Тејлор – Џој и други.
ПРИФАТЛИВ ГУБИТОК
Во трилерот „ Прифатлив губиток“главните улоги ги толкуваат:Тика Самптер,Џејми Ли Кертис,Бен Тавасоли и Џеф Хефнер.
Приказната на филмот се врти околу некогашната американска советничка за сигурност Елизабет „ Либи“Лем на која и се закануваат нејзините соработници од нејзиното мрачно минато, вклучувајќи ја и Рејчел Бурк, цврста заповедничка политичарка со непоколеблив смисол за постигнување на своите цели.Во договор со неа е и Адриен, непоколеблив патриотски шеф на вработените.Мартин во оваа приказна за предавстото и сожалувањето има уште еден вид на опсесија кон Либи.Режисер на филмот е Џо Чапел.
НАСЛЕДНИЧКИ
Чела и Чикита потекнуваат од богати семејства од Асунсион и заедно се веќе 30 години. Но од неодамна нивната финансиска положба се влошува и тие започнуваат да ги продаваат наследените предмети.. Но кога нивните долгови ќе доведат до тоа Чикита да биде затворена заради измама, Чела е принудена да се соочи со нова стварност.Таа за првпат во животот започнува да работи како таксист притоа превезувајќи дами за забава.Започнувајќи нов живот ,таа ќе ја запознае многу помладата Енџи,со која ќе стапи во врска. На тој начин таа најпосле излегува од својата стара кожа и започнува да соработува со светот, впуштајќи се во својата лична интимна револуција.
Режисер на овој парагвајски филм е Марчело Мартинези а главните улоги ги толкуваат:Ана Брун,Маргарита Ирун,Ана Иванова,Нилда Гонзалес и други.
Филмот има освоено над 30 меѓународни филмски награди меѓу кои и наградата за најдобра женска улога за актерката Ана Брун на минатогодишниот филмски фестивал во Берлин.
ВЕШТИНА НА ЖИВОТОТ НА ВОЗРАСНИТЕ
Досега љубителите на филмот имале можност да погледнат навистина голем број на филмови во кои се говори за возрасни личности кои и понатака живеат со своите родители, во гаражи или во подрумските простории на своите семејни куќи, притоа избегнувајќи да се соочат со предизвиците на животот како возрасни личности.Слична тема третира и комедијата со драмски елементи„ Вештина на животот на возрасните“со тоа што главната личност на приказната која ја портретира Џоди Витакер не живее во подрум туку во шупа која се наоѓа во семејниот двор.Нејзиното име е Ана и таа се наоѓа на прагот од својата триесетта година но одбива да се соочи со реалноста по смртта на нејзиниот брат.Одкако ќе се пријави да биде волонтер во своето училиште, таа ќе запознае едно момче кое е облечено како Клинт Иствуд и кое се вика Клинт а кое се чини дека ќе и’ го смени животот. Се поставува прашањето дали Ана е подготвена да порасне и да се однесува како возрасна личност и дали ќе биде тука за Клинт одкако неговото семејство ќе доживее несреќа.
Во оваа драма со елементи на комедија кое е режисерско деби на Рејчел Тунард , главните улоги ги толкуваат:Џоди Витакер,детето Ози Мејерс, Лорен Ешбурн, Брет Голдстејн и Рејчел Дерик.
СРДЕЧНОСТ
Следниот петок пред гледачите премиерно ќе биде прикажан филмот „ Срдечност“во кој главните улоги ги толкуваат:Метју Мек Конахи,Ен Хатавеј,Дајан Лејн и Џејсон Кларк Режисер на оваа трилер драма е Стивен Кнајт
Таинственото минато на капетанот на едно рибарско бродче се враќа за да го прогонува, одкако неговата некогашна сопруга очајнички бара помош од него
ПОСЛЕДНА ЖЕЛБА
По смртта на својот татко,Арон се враќа дома за да и помогне на својата мајка која е погодена од тагата а воедно да се соочи со своето минато. Пребарувајќи по старите работи од неговиот татко, тој ќе налета на еден таинствен предмет кој изгледа уште потаинствено одколку што се чини дека е.
Режисер на овој хорор е Тимоти Вудворд јуниор а главните улоги ги толкуваат:Лин Шејн,Мајкл Велч, Мелиса Болона и Спецер Лук.
САКАНИОТ ФЛИН
Се работи за биографски филм во кој е прикажан раниот живот на Ерол Филн во Австралија пред тој да стане голема холивудска филмска ѕвезда со светска слава.Во раната младост тој бил голем авантурист, криумчар на опиум, коцкар, уличен борец, женскар и златар.
Филмот е темелен врз раната автобиографија на Филн која за големото платно ја прилагодиле Ларџ и Лук Флин. Инспирацијата за тоа ја пронашле по нивното патување во Австралија по стапките на дедото на Лук.Филмот имал буџет од 12 милиони долари.
Режисер на филмот е Расел Мулкахи а ликот на Ерол Флин го толкува актерот Томас Кокерел. Покрај него наста пуваат уште и:Натали Кели,Вилијам Мозли и Изабел Лукас.
Ѓоко Симјаноски, Публицитет.мк