Во вториот дел од информацијата за новите филмови во месец јуни, ќе ве запознаеме уште со десетина филмови кои премиерата ја имаа во изминатиот петок и вчера на 25. јуни.Меѓу нив има неколку наслови кои би можеле да бидат потенцијални филмски хитови во месецот во кој и календарски влеговме во годинешното лето, период кој во некои други предпандемиски времиња , беше преполн со филмски блок бастери.
ТЕЛОХРАНИТЕЛ НА ЖЕНАТА НА МАФИЈАШОТ
Оваа акциона комедија , која говори за најсмртоносната двојка на светот – телохранителот Мајкл Брајс и убиецот Дариус Кинкаид- повторно се во животна опасност.Сеуште без дозвола и под присмотра, Брус на акција го принудува сеуште понестабилната сопруга на Дариус, озлогласената меѓународна измамничка Соња Кинкаид. На овој забавен и смртоносен хаос му се приклучуваат уште и Морган Фримен и Антонио Бандерас.
Дејствието на филмот е сместено четири години подоцна по случувањата во првиот филм снимен во 2017 година во кој главните улоги ги толкуваа Рајан Рејнолдс, Семјуел Л.Џексон и Салма Хајек.
Филмот премиерно беше прикажан изминатиот викенд кога веднаш се искачи на првото место на најгледани филмови во САД.
БРАЌАТА СПАРКС
Овој документарен музички филм им е посветен на браќата Рон и Расел Спаркс од Лос Анџелес и говори за нивниот пат кон успехот . Почнувајќи од училишните денови па се’ до нивните големи успеси на сцената каде опстојуваат цели пет децении , период во кој издадоа 25 студиски албуми.
Филмот беше за првпат прикажан на годинешнопт фестивал на независни филмови Санденс, каде доби високи оценки од критиката.Режисер на филмот е Едгар Врајт.
СИБИР
Филмот „Сибир“ говори за Клинт, осамен човек без иднина кој живее сам во замрзнатата тундра.Оваа изолација не може да му донесе ниту живот ниту мир.Една ноќ тој одлучува да започне патување каде што мора да се соочи со своите соништа, спомени и визии , преминувајќи од темнината во светлина. Филмот беше прикажан изминатата година на фестивалот во Берлин. Главната улога во овој мошне тежок филм ја толкува Вилијам Дефо а режијата ја потпишува познатиот режисер Абел Ферара. Ова е инаку нивна шеста заедничка соработка.
РИТА МОРЕНО:ДЕВОЈКА КОЈА РЕШИ ДА СЕ ПОСВЕТИ НА ТОА
Овој документарен филм преставува поглед на животот и делото на Рита Морено од нејзините скромни почетоци во Порторико до нејзините успеси на Бродвеј и во Холивуд. Таа се прослави со улогата во мјузилот „Приказна од западната страна“ во 1961 година кој се закити со 10 награди Оскар. Интересно е да се спомене дека таа по цели 60 години настапува и во римејкот на овој филм во режија на Стивен Спилберг , кој премиерата треба да ја има на 10 декември оваа година.
Режисер на документарниот филм е Мариен Перез Риера.
12 СИЛНИ СИРАЧИЊА
Станува збор за спортска драма , приказна која досега била тема на повеќе филмови, и без обзир што таа е темелена врз вистинска случка, со предвидлива приказна, секогаш, ќе се најде публика за ваков вид на филмови.
Дејствието на филмот е сместено во Амерка за време на Големата депресија . Прогонуван од своето мистериозно минато , еден посветен тренер за фудбал во средно училиште, води еден слаб тим составен од сирачиња на државниот шампионат. Филмот донесува приказна која го унапредува американскиот фудбал,како и самото сваќање на тој спорт.
Режисер на филмот е Тај Робертс а главните улоги ги толкуваат :Лук Вилсон, Роберт Дувал, Ванеса Шо , Мартин Шин и разбира се, 12 те млади актери кои ги играат членовите на овој тим.
РОДЕНДЕНСКА ТОРТА
Филмот започнува со 10 годишнината од смртта на таткото на Џовани кој неволно ја прифаќа задачата токму тој да ја продолжи традицијата да донесе роденденска торта во домот на неговиот чичко Анџело, последниот шеф на мафијата , на прославата на неговиот роденден.
Само два часа по полноќ, животот на Џовани за секогаш ќе се промении тој е принуден да порасне откако ќе биде сведок на убиство, насилство , хаос и кога ќе ја дознае вистината за тоа што му се случило на неговиот татко.
Режисер на овој крими трилер е Џими Гианопулос а главните улоги ги толкуваат: Шилох Фернандез, Вал Коилмер, Јуан Мек Грегор, Вилијам Фитчер, Лораин Брако, Виктор Пасторо и други…
ЗМИЈАТА
Филмот преставува мешавина од повеќе жанрови:акција, комедија, хорор, мистерија…
Една врвна специјална агентка работи во тајниот оддел на ЦИА. Таа добива специјална задача , која таа ќе и ја довери на својата сопствена агенција.
Режисер и толкувач на главната улога е Гиа Скова а тука се уште и Травис Арон Ваде, Александра Тебано, Џејсон Скот Џејкинас, Лин Готони и други.
Ф9:БРЗАТА САГА
Еден од најдолговечните филмски серијали секако е „Брзи бесни“ кој започна пред точно 20 години. Од тогаш досега се реализирани осум филмови а деветтиот насловен како „Ф9:Брзата сага“ од вчера започна да се прикажува во кино салите во САД и низ целиот свет. Режисер на филмот е Џастин Лин а филмската екипа е предводена од Вин Дизел кој настапи во сите досегашни филмови од овој серијал. Покрај него во филмот настапуваат уште и Мишел Родригез,Џордана Бревстер, Чарлиз Терон, Џон Кена, Тајрис Гибсон, Хелен Мирен, Курт Расел, Лукас Блак …
Сифер ја бара помошта од Џејкоб, помладот брат на Дом, за да му се одмазди на Дом и неговиот тим.
ЛАНСКИ
Се работи за биографска крими драма која говори за остарениот гангстер Мејер Лански. Кога федералните служби за последен пат ќе го испитуваат стариот гангстер под сомнение дека тој однел милиони долари во текот на половина век, пензионираниот гангстер раскажува вртоглава приказна , откривајќи ја нераскажаната вистина за неговиот животкако озлогласениот шеф на „Убиството АД“ и националниот синдикат за криминал.
Режисер на филмот е Ејтан Рокавеј а главните улоги во филмот ги толкуваат:Минка Кели, Ана Софија Роб, Дејвид Џејмс Елиот, Сем Вортингтон, Џеки Круз, Харви Кител , Џон Магаро и други.
ЛЕДЕНИОТ ПАТ
Од вчера во кино салите започна да се прикажува и авантуристичката драма со елементи на трилер „Ледениот пат “ на режисерпт Џонатан Хеслинг.
Откако ќе се сруши еден рудник за дијаманти во далечната северна Канада, двајца возачи ќе мораат да подготват спасувачка мисија за да ги спасат рударите кои се заробени под земја.Но, помеѓу нив и несреќните рудари се протегаат километри на непредвидлив мраз.Мразот и ниските температури , ќе биде најлесната пречка во однод на она што ги очекува…
Главните улоги во филмот ги толкуваат : Лиам Нисон, Лоренс Фишбурн, Маркус Томас, Бенџамин Волкер и други.
Пишува: Ѓоко Симјаноски, Публицитет.мк
