По минатогодишниот „принуден одмор“, поради забраната на ЗАМП за изведба на песни од македоснки автори, во четврток и петок, на 21. и 22. септември, ќе се одржи 32. издание на најстариот и најреномиран фестивал на новосоздадени македонски песни – Фолк фест Валандово. Ова фестивалско издание е конципирано во две фестивалски вечери, од кои првата вечер ќе биде ревијална, а втората со натпреварувачки карактер.
На ревијалната вечер ќе бидат изведени 16 популарни песни од поранешните фестивалски изданија на „Валандово“, а ќе настапат доајени, но и помлади реномирани пејачи од македонската музичка сцена, како: Виолета Томовска, Перо Христов, Нино Величковски, Петар Нечоски, Благица Калева, Душко Георгиевски, Анета и група „Молика“, Јордан Митев, Кирил Митоски, Елена Велеска, Влатко Лозаноски – Лозано, Мите Стоилков, Машката пејачка група на „Танец“, Јовица Наумчевски…
Втората вечер е со натпреварувачки карактер, а ќе бидат изведени 18 нови песни од реномирани авторски имиња, во изведба на популарни пејачи и неколку млади пејачки имиња: Ленче и Горан Кукиќ со групата „Јупитер“, Ибуш Ибраимовски, Кате и „Нели ти реков“, Горан Тодоровски, Билјана и Борис Димови, Сузана Јовчева и Милован Секуловски, Тања Стефановска, Јасмина Гуњова и „Скопски боеми“, Сања Петковска – Сани, Кирил Митоски, Ани Малинкова, Мето Богданов, Јуле Николовска, Игор Ангелов, Марија Петковска, Дамјан Стојановски, Јована и орекестар „Табиет“, и Мики – Тралала.
Во двете фестивалски вечери песните ќе бидат изведени во живо, во придружба на голем фестивалски оркестар. И оваа година ќе бидат доделени три награди, според гласовите од телевоутингот и стручната жири-комисија. Од организаторот, Општина Валандово, велат дека наградите се примамливи, но сепак не се наведува паричниот износ за кој е извесно дека сепак не е 20.000 евра, како што беше пред три години, кога Министерството за култура почна да ги спонзорира наградите.
Фолк фест Валандово ќе се пренесува директно, на програмите на МРТ, со почеток во 20.30 часот.
За Публицитет.мк (Ј.П.)