Значи сте решиле дека е време да се купи уметничко дело? Што треба да сторите?
Вашиот прв чекор нека биде посета на што повеќе галерии со можност да видите повеќе стилови на изразување и типови на уметност.
Во денесно време преку Интернет можете да посетете повеќе галерии со само едно кликнување на тастатурата.
Така и Галеријата БУКЕФАЛ лесно ќе пронајдете и се разбира и нашата понуда, независно каде сте по светот.
Уметничките галерии се добра основа за почеток затоа што галеристите се тие кои гледаат илјадници слики и прават селекција која ја изложуваат во своите галерии мислејќи дека се тие вистинските за нивните клиенти ( купувачи).
Првото патување во светот на уметноста нека ви биде фокусирање односно пронаоѓање на вашиот вкус, со кој тип на слики би можеле да живеете секојдневно. Едноставно кажано тоа би значело да се одбере кој стил на уметност би ја задоволил вашата перцепција дали тоа е: реализам, импресионизам, апстракна уметност … или со кој автор би се “идентификувале” Манасиевски, Кондовски,Мартиновски,Качев…
После дефинирањето на вашиот вкус за стил во уметноста убаво би било прелиминарно низ разговор со галеристите да се запознаете поконкретно со сликите кои се изложени во нивните салони.
Галеристите обично се желни за разговор посебно за сликите кои тие ги избрале и изложиле и можат да споделат информации со Вас во врска со конкретните дела. Може истовремено да ве запознаат и со дела од други автори кои го негуваат стилот на уметност кој што вие сте го избрале и нормално да одговорат на вашите љубопитни прашања.
Распрашајте се малку повеќе во врска со историјата на галеријата,колку години постои? Колкав период соработуваат со вашите омилени сликари? Дали се експерти во дејноста што ја работат. Имајки го во предвид фактот дека купувањето слики односно уметнички дела ќе ви биде доживотна опсесија пожелно е да воспоставите пријателски односи со галеристот како и взаемна доверба.
Независно од која академија, кој правец во уметноста го негуваат уметниците, цените на нивните слики се релативни што би значело дека зависат од повеќе фактори. Како и да е, како што ќе расте вашата колекција вие ќе барате можности да обезбедите и слики што се со поголема вредност и автори кои се значајни за уметничкото постоење на просторите каде што творат и пошироко.
Најважна работа што треба да се запамети кога го почнувате Вашето патување во светот на уметноста е да купувате дела во кои што ќе уживате гледајќи ги.
Пишува: Љупчо Жупан, галерија Букефал – Охрид
Публицитет.мк
