Во саботата, на 21 март од страна на совесни граѓани телефонски бев известен дека во месноста „Пресека”, на територијата на Општина Дебрца, на локацијата каде се наоѓа депонијата, односно одлагалиштето на инертен отпад ( земја, шут и слично ),кој се црпи по трасата на Автопатот А2 ( во изградба ) забележано е депонирање на комунален отпад од страна на возила со кичевски регистарски таблички, реагира градоначалникот на Дебрца, Зоран Ногачески.
-По пријавата веднаш излегов на лице место, каде констатирав дека во одлагалиштето за инертен отпад е депонирано одредено количество на комунален отпад.Во текот на денот на истото место увид извршиле и претставници на Координативното тело и месните заедници од околните села, со кои телефонски контактирав.Со оглед на тоа да за одлагалиштето одговорни се ЈП за државни патишта, како инвеститор, Градежниот институт Македонија, како надзорен орган и АД Илинден, како изведувач, до сите три субјекти денес испратив претставка со барање депонираниот комунален отпад да се отстрани од одлагалиштето и најостро предупредување во иднина да не се дозволи во одлагалиштето да се депонира комунален и друг вид на отпад од било кој субјект, односно побарав проблемот да се реши на институционален начин и без тензија, а која најмалку ни е потребна поради вонредната состојба во која се наоѓаме, вели Ногачески.
Тој додава дека во спротивно, против субјектите одговорни за управување со одлагалиштето, ќе бидат преземени сите со закон дозволени правни средства.
-Голема благодарност за граѓаните кои покажувајќи висока свест за еколошката иднина на нашата општина и држава благовремено реагираа, вели градоначалникот на Дебрца, Зоран Ногачески.
Публицитет.мк