Ова „ново нормално“ време кое го живееме дружбите меѓу луѓето ги направи ретки. Оттука и бројот на соговорниците во аудио серијалот „Мојот живот, мојот свет“ оваа шеста сезона стагнира, но се надеваме не за долго. Интервјуто со човекот кого сакаме да ви го претставиме, верувале или не е направено во мај 2018 година, во Охрид и еве конечно му дојде редот за емитување. Му благодариме на господинот Илко Димитриески за неговата трпеливост и љубезност, но ете некои работи не одат така лесно и покрај посакуваното.
Кој е Илко Димитриески? Ние би рекле човек роден 1953 под Шар Планина во Тетово кој сега живее со семејството на релацијата Охрид – Скопје – Охрид.
Јавноста последниве години го знае како поети и писател и почесен претседател на манифестацијата „Маџирмаалски поетски бранувања“.
Со Илко Димитриески раговара Милчо Јованоски
Димитриески зад себе има 8 издадени дела а деветтото ја чека помошта од Министерството за култура.
Неговото „новороденче“ се појави во 2013 година. Тогаш ја промовираше стихозбирката „Аксиј“. Следната година ја издава втората книга поезија „Патешествие“.
Неговиот порив за пишување не запира. Во 2015 г. издава дури две книги. „Охридска Идила“ поезија со која вели дека ја воспева охридската волшебница и копнее ова дело да го претвори во анимирана бајка. „Астеропај“ е негов авторски занес – комбинирано дело како што вели: – поетски напеви , афоризми и мудрости…
Во 2017 Илко издава дуплекс книга. Едната е „Тасот на спасот“ – поезија за НОБ на Југословенските народи каде нашиот македонски народ го дал својот полн придонес.
Другата книга содржи декларации прокламации и соопштенија…
Слушнете ја аудио книгата ТАСОТ НА СПАСОТ
Пред две години во 2018 г го издава романот за трагично починатиот народен херој генерал Васко Карангелески „Карангел Бруснички“ а лани поетското дело „Куделес“.
Во родното Тетово завршил основно и со многу емоции зборува за животот покрај Пена. Средно воено училиште завршил во Сараево.
Од 1970 година станува жител на Охрид. Тука се вљубува во Вера од Охрид и формираат свое семејно гнездо и е дел од Гарнизонот на ЈНА во Охрид. Вели дека го љуби и воспева Охрид преку своето творештво. Илко отворено зборува за сите фази од својот живот за почетоците во литература , за бизнисите во раните деведесетти и напуштањето на Армијата и секако за убавите пензионерски денови.
Интервјуто содржи неколку музички нумери по желба на нашиот соговорник и секако досетки и анегдоти.
Публицитет.мк
