Наш и Ваш гостин е Крсте Наумоски- Мечкар, поетот, хуманист и активист од Мелбурн, Австралија.
Крсте е роден на 2 април 1945 година во село Мислешево, Струга, а до заминувањето за Австралија живеел во селото Оровник, во близина на Охрид.
Тој е син на Науме и Митра Мечкароски. Во слава и почит кон погинатиот татко кој бил борец во НОВ а кого Крсте не го запознал ( Наум починал само еден месец по неговото раѓање) го зел презимето Наумоски.
Крсте со сопругата Нада
Кликнете подолу за да го слушнете аудио интервјуто во целост. Со Крсте Наумоски – Мечкар разговара Милчо Јованоски
Новиот живот на новиот континент го започнува во Мелбурн работејќи како мијач на садови, во касапници, на градење патишта за по извесно време да почне да заработува од гравирање на стакло и кристал кое и денеска му е хоби. Работел и работи и во првата професија- забен техничар.
Од снимањето на интервјуто во Охрид
Кон крајот на седумдесеттите се враќа во Македонија. Сметал, со заработеното дека и во родниот крај ќе може да живее добро, но економската состојба која ја затекнал го натерала пак да ги наполни куферите и да се врати во неговата втора татковина, таму каде што и сега му се тројцата синови и внуците.
Кога внуците честитаат, задоволството е најголемо
По извесно време Крсте станува се’ поактивен во македонската заедница. Тој е еден од иницијаторите и основачите на охридското Социјално друштво „Св. Наум Охридски“. Во 1982 година, по ред успешни големи пикници во околината на Мелбурн тој и негови пријатели го создале друштвото. Во ова аудио интервју,тој зборува токму за тие денови, првите акции и годините минати во служба на хуманоста.Неуморен бил и во организирањето на Деновите на македонската култура во Викторија. Присутен е во тамошните македонски неделници и на програмите на 3ZZZ и 3INR македонски радиостаници во Мелбурн.
Со кралицата Елизабета Втора, април 1988 г.
Македонската дијаспора го познава и како голем активист за правата на Македониците во Австралија. На негова иницијатива била формирана Федерацијата на македонските асоцијации во Викторија ФОМАВ, Илинденскиот фестивал и ред други настани од областа на фолклорот.
Во 1988 средба со тогашниот премиер на Австралија Роберт Џејмс Ли
Го знаат за вешт оратор, праведен човек, човек со посебна енергија и поглед на светот.
Според другите тој е маркантна личност во македонската заедница во Викторија – Австралија, чие име се изговара со почит поради сите негови достигнувања и вложувања за промоција и афирмација на Македонците во Австралија. Крсте вели: -Во последно време имаме таму многу фејсбук манекени – лидери,а во реалноста како да нема кој да не води. Целосна разединетост, таква е нашата дијаспора, додава дека сонот е еден ама секој го сонува на свој начин и никако поинаку. Признава дека и Македонија не им помогнала тоа чувство да се премости. Тој јаз од поток се претвори во река , се шири, се изрази поетски Крсте, напоменувајќи дека и во црквите се чувствува разеденетоста.
Со Душан Ристевски и Иван Трпоски од Македонското литературно друштво „Григор Прличев“ од Сиднеј
-За нас во дијаспората не треба да има партии- за нас партија треба да биде Македонија, вели Крсте. За него болка е и тоа што сите овие години не успеале да профилираат тамошен македонски политичар да стане пратеник во австралискиот парламент. Причина е раздорот помеѓу нив.
На промоција со Виолета Јовановска, во тоа време уредничката и водител на македонската редакција на SBS
Зборувавме и за неговите две поетски збирки „Солзи. Клетви Надежи“ од 2003 и „Копнеж и Надеж“ – 2015 г. Песните во нив, всушност се рефлексија на очекувањата наспроти реалноста.
За онаа од песните „Проклета да е Австралија , ми ја запусти фамилијата“, вели дека сега нашинците ја пеат – ми ја збогати фамилијата. Кој дојде во Австралија назад не се врати…
Средба со премиерот на Викторија во 1989 г.
Во интервјуто Крсте Наумоски – Мечкар како на дланка ни го претставува неговиот живот и свет. Зборува за носталгијата што го мачи за ваму,а кога е овде го влече повторно, за таму каде што се неговите потомци.
Интервјуто е снимено во септември, годинава за време на посетата на неговиот роден крај.
Во интервјуто од шеесетината негови текстови претворени во новокомпонирани песни слушнавме само неколку, а ни откри и зошто најомилена уште од дете му е песната за војводата Христо Узунов.
Автор и водител: Милчо Јованоски
Публицитет.мк
