Почитувани, добредојдовте во новата – петта сезона на рубриката „Мојот живот, мојот свет“ на Публицитет.мк Случајот сакаше од неколкуте веќе снимени во јавност, прво да излезе ова денешното со Зоран Стевоски.
Годинава, Стевоски слави 40 години од првата негова работна акција „Морава 1979“. Повозрасните го знаат и како командант на некогашната Младинска бригада „ Илинден“ со која ширум некогашна Југославија градеа патишта, пруги, мостови и се разбира се враќаа со високи одличја.
За да не прозвучи ова интервју како некој политички памфлет или носталгичност по времето кое одамна поминало, водителот и автор на серијалот Милчо Јованоски и соговорникот Стевоски заеднички се оградуваат со ставот дека се’ она за кое се зборува во него е дел од нивниот и животот на сите генерации кои растеле во една друга држава и систем.
Со клик на линкот слушнете го во целост аудио интервјуто со Зоран Стевоски
Според Стевоски најромантичниот дел од југословенската историја биле Доброволните младински акции.
Тој не потсетува и на двете работни акции „Брег на младоста “ одржани во Охрид во 1984 и 1985 на изградбата на водоводот Метропол – Охрид, се работеше на откривањето на античкиот театар, се изгради патот Охрид – ресен најубавата делница, најголемата ПТТ инфраструктура во Охрид ја правеа акцијашите и не само во Охрид и Струга.
– Јас не можам и по 40 години да си го објаснам феноменот на разделбите по акцијашките дружби. И тогаш ние и сега нашите млади реагираат исто. Само што овие денешните акцијаши се многу помудри и рационални и секако повеќе свои од нас, вели Зоран.
Стевоски своевремено беше добитник и на тогашното највисоко општинско признание „Седми ноември“ а беше носител и на сојузната Штафета на младоста.
Ни раскажа за будните ноќи пред тој настан, за стравот дали се’ ќе помине како што треба и за тоа дека пред извесно време при посетата на Музејот „25 Мај “ во Белград ја пронашол штафетата која имаше чест да ја носи до бината на градскиот плоштад во Охрид.
За тие и и за овие времиња, за страста кон акцијаштвото која за Зоран е еднаква на живот и за и многу други нешта слушнете го првото издание на „Мојот живот, мојот свет“ кое секако носи и музика од тоа време.
Публицитет.мк
