„Австрија годинава е подготвена да прими 37.500 бегалци, по што ќе биде принудена да ги стопира бегалците.
Македонија треба да се подготвува за ваквото сценарио“- оваа порака ја испрати австрискиот шеф на дипломатијата, Себастијан Курц, по средбата со домаќинот Попоски во Скопје. Нашиот министер, пак, рече дека низ Македонија ќе минат толку мигранти колку што ќе бидат примени во земјите- членки на Европската унија…
„Македонија мора да биде подготвена комплетно да го стопира влезот на мигрантите во нејзините граници, по Грција таа е првата држава која се соочува со мигрантите. Оттука знаеме дека oва е тешка задача и се договоривме дека Австрија ќе даде своја поддршка и тоа не само во форма на персонал од полицијата и војската туку и во опрема за да ѝ се овозможи на Македонија да се справи со предизвикот“, изајви Курц.
„Ја обезбедивме границата и ќе продолжиме да ја обезбедуваме и со помош на повеќе партнерски земји и Австрија, таа контрола ќе биде доведена на ниво на кое максимално ќе спречиме каков било влез. Единствениот начин за влез во Македонија ќе биде на место кое е легално обележано. А бројот на влезови ќе зависи од бројот на луѓе прифатени од ЕУ“, нагласи Попоски.
Дали ќе се отворат дополнителни кампови, според Курц, зависи од политиките што ќе ги водат државите кои се цел на бегалците. За решавање на политичката состојба во земјава, австрискиот министер ги повика Владата и опозицијата да ги почитуваат договорирте за да може да се обезбедат слободни и фер избори.
Извор: www.mrt.mk
