Сите хотели во Охрид како и помал дел од приватните сместувачки капацитети, се закупени за новогодишните празници. Хотелиерите се презадоволни и се надеваат дека намалувањето на прометот од 10 проценти во последните месеци од 2016 година, ќе го ублажат со претстојниот празничен викенд.
Традиционално, покрај домашните најголемиот број од туристите во Охрид и Струга се од соседните земји, пред се Бугарија, Србија, Албанија и во помал број од Грција.
Гости има и од Црна Гора и Хрватска, а со индивидуални аранжмани, присутни се и одреден број новогодишни славеници и од Велика Британија, Полска и Израел.
Хотелиерите се задоволни што Бугарите, кои еден подолг период апстинираа, повторно доаѓаат, така што токму тие ќе и дадат печат на годинешната прослава.
Колку за илустрација, хотелот „Силекс“ е целосно закупен од гости од Бугарија.Тие ќе доминираат и во хотелите „Гарден“ и „Нова Ривиера“, а присутни се и во двата хотели „Тино“, каде што во најголем број се гости од Србија и Црна Гора.
Охридските угостители за празниците понудија аранжмани од два до пет дена, а цената зависи од категоријата, како и од времетраењето на престојот.
Тридневните аранжмани, на база на полупансион, чинат од 100 до 160 евра, со вклучена свечена новогодишна вечера.
Свечена новогодишна програма, традиционално подготвува и локалната власт на градскиот плоштад „Св.Климент Охридски“, каде присутните ќе ги забавуваат Ѓоко Танески и Елена Велевска.
Покрај во Охрид и во соседна Струга, хотелските капацитети се речиси распродадени.
Извор: www.meta.mk
