Денеска е 1 Декември, ден за борба против ХИВ/СИДА кој се одбележува на мегународно ниво. Здружението на граѓани Опција, кое работи со дневни центри на територија на Охрид и Струга, фокусирани посебно со групи кои се под најголем ризик, традиционално веќе неколку години по ред, во соработка со други организации, го одбележува овој ден со низа активности, едукации и тестирања не само со целната група туку и со локалното население во Охрид и Струга.
Досегашното искуство и пракса ни покажува дека Опција Охрид нема детектирано лице заболено од ХИВ вирус што е одличен показател дека целната група е доволно информирана за тоа како се пренесува вирусот и кој е начинот на заштита. Македонија е земја со ниска ХИВ-преваленца односно вирусот е ставен под контрола благодарение на овие превентивни програми кои се спроведуваат во повеќе од 9 градови, со финансиска поддршка од Глобал Фонд –Женева, проект за борба против ХИВ/ СИДА, Туберкулоза и Маларија.
Оваа година, Платформата за одржливост на сервисите за превенција и поддршка за ХИВ, која ја сочинуваат 16 здруженија на граѓани, одлучија акцент да стават на важноста и значењето на овие сервиси и нивното опстојување после заминување на донаторот во јануари 2017 година.
По тој повод, денеска со почеток во 12.00 часот во Скопје е организиран протестен марш со цел да го изразиме нашето незадоволство од донесување на скратениот буџет за националната програма за ХИВ, програми кои се од големо значење за повеке од 15 000 лица кои ги користат услугите, но исто така и програми кои се дел од областа на јавното здравје .
Ова нека биде само еден апел државата да ги препознае и поддржи овие хумани политики и да не дозволи да ни се случи она што им се случи на Романија и Грција, односно епидемија на ХИВ вирус.
Јулијана Настоска
Социјален работник, „Опција“ – Охрид
Публицитет.мк
