Монографијата ќе биде збир од спомени и фотографии на некогашните и сегашните членови. Раководството на КУД „Ѓердан“ од Охрид ги поканува сите членови на еден или друг начин да помогнат во нејзиното издавање зад кое стојат Министерството за култура и Општина Охрид.
Идејата за формирање на КУД ЃЕРДАН од Охрид се родила 1967 година со формирањето на оркестар од страна на познатиот охридски музичар и диригент Наум Гаврилоски. За да се формира и фолклорна група идеја дал тогашниот директор на „Охридско лето“ писателот Миле Волканоски.
Друштвото официјално е регистрирано во април 1968 година и тоа е прво фолклорно друштво во Охрид.
Првичната цел била друштвото да настапува пред странските и домашните гости во охридските хотели и на тој начин да се збогати културната понуда.
Од тогаш до денеска 50 генерации музичари и играорци ја пренесле славата на македонската игра и песни низ светот. Речиси една година раководството на КУД Ѓердан работи врз Монографијата која треба да биде промовирана во септември годинава.
-Тешко е да се води прецизна статистика на членовите а и на концертите но сигурно се мери со неколку стотици.
Тоа е директниот повод и за Монографијата 50 години КУД ЃЕРДАН да се забележи се’ и дел од историјата да биде зачувана во колективната меморија на градот и за идните генерации. Токму Монографијата треба да биде плод и круна на постоењето на друштвото кое и денеска егзистира и од кое излегоа голем број луѓе кои подоцна формираа нови друштва во Охрид. КУД ЃЕРДАН воедно е бренд и на Македонија негови играорци продолжувале во Танец и ред други друштва за време на студирањето или отселувањето од Охрид. Витрините на ова КУД се преполни со награди и признанија и спомени за едно време минато, но и за сегашноста во која ЃЕРДАН има задача и мисија младите да не ги заборават македонските корени, песни и традиции, вели сегашниот раковидтел и уметнички директор на друштвото Методија Бараковски – Менде.
Како и секоја така и оваа Монографија има за цел да ги зачува сеќавањата , фотографиите и податоците за КУД Ѓердан од неговото формирање до денеска.
По изработката во околу 500 примероци и нејзината промоција Монографијата за КУД ЃЕРДАН ќе остане како еден запис за оние кои го создале првото фолклорно друштво во Охрид, но и патоказ за идните генерации кои ќе дојдат во иднина да знаат како функционирал фолклорот како дел од националната македонска култура кој не само што има уметничка , туку и социолошка димензија да го зачува времето минато преку презентацијата на песните, ората , обичаите и носиите. Монографијата ќе има околу 150 страници со стотина фотографии црно-бели и во боја.
Оттука, вели Бараковски ги повикувам сите членови на КУД „Ѓердан“ да ми се јават, да ме побараат и да споделат спомени и фотографии. Сигурно дел од нив ќе се најдат во монографијата.
Публицитет.мк
