Есента е на прагот, па по неа и зимата само што не стигнала. Најактуелен разговор меѓу граѓаните деновиве освен за зимниците е оној кој почнува со прашањето:- Дали набавивте дрва за огрев?“
На социјалната мрежа Фејсбук осамнаа две интересни видеа кои ни откриваат еден нов и далеку побрз начин на дотур на огревно дрво со помош на адаптиирана жичарница.
Оваа жичарница е во сопственост на подружницата „ Бор“од Кавадарци а снимките се направени на падините на Рожден.
„Публицитет.мк“ го контактираше директорот на подружницата магистер Слободанчо Климоски и еве како тој го објаснува овој технолошки изум за кој вели дека е првпат да се употреби во Македонија.
-Вообичаено е на овој начин со жичарница да се дотураат трупци, односно техничка дрвна маса. Но многу ретко се успева да се направи дотур на огревно дрво како во нашиот пример. Маката не натера, се’ со цел да се избориме и да дојдеме до некој кубик повеќе огревно дрво како би можеле што повеќе и побрзо да го снабдиме населението со огревно дрво, пред да застуди и да почнат есенските дождови. За овој начин на дотур на огревно дрво не велам дека е прв случај во светот, но во Македонија секако дека е, ни изјави м-р Климоски.
– Вообичаено со жичарница се дотураат трупци, а дрва за огрев е тешко затоа што се растураат при пакувањето и обидот за транспорт кога ќе се подигнат. Интересно е тоа што за само две минути се дотура еден кубик на одредено растојание. Споредено на пример со ангажирање на три коњи, на кои за да ја пренесат истата количина на истото растојание им се потребни дури 15 минути, вели Климоски.
Оперативата на Шумско стопанство „Бор“ од Кавадарци е најголема и една од најуспешните подружници во Република Македонија, односно во рамките на ЈП „Македонски шуми“.
Публицитет.мк
