Со пригодна церемонија во Соборниот храм Свети Климент Охридски, а по повод големиот празник Свети Стефан, вчера му беше доделена “Цветинова награда за мир” на протоереј д-р Ратомир Грозданоски, универзитетски професор на Богословски факултет во Скопје.
Уметникот и хуманист Живко Поповски-Цветин му ја врачи наградата со своето име, што ја востанови од минатата година, на која беа нацртан три златни цвета, а во знак на признание за неговиот севкупен придонес за мирот и воздигнување на духовните вредности, воедно и за прозното воспевање на цвеќето, преку есеите што д-р Грозданоски ги напиша во книгата “Цвеќе на мирот”, како и за низата научните студии на тема “Цвеќето во Библијата” , која сѐ уште е предмет на негово истражување и опишување.
Церемонијата на доделување се одржа во салата на Македонската православна црква, во присуство на неговото семејство и неколку медиумски претставници, а со почитување на сите протоколи.
Ратомир Грозданоски (Брест, Шорече, Македонски Брод, 15 мај 1959) е македонски теолог, професор и протоереј.
Во 1978 г. Гроздановски завршил Македонска православна богословија, а во 1983 дипломирал на Православниот богословски факултет во Скопје. Во 1994 магистрира, а во 2001 докторира на Филолошкиот факултет, при Универзитетот „Св. Кирил и Методиј“ во Скопје.
Бил и на студии на Аристотеловиот универзитет во Солун и на Филолошкиот факултет при Универзитетот во Атина. Посетувал настава и на Богословскиот факултет во Атина, а бил и на студиски престој во Даблин, Ирска.
По враќањето во Скопје, работи како референт за просвета во Скопската митрополија, а потоа е поставен за професор во Македонската православна богословија, каде останува седум години, а во 1990 година е избран за наставник на Православниот богословски факултет во Скопје, по предметите Библија – Свето писмо на Новиот завет и старогрчки јазик. Во 2006 година е избран и за декан на Факултетот.
Бил близок соработник на поглаварите: Ангелариј, Гаврил, Михаил и Стефан.
Член е на Советот за меѓурелигиска соработка во Република Македонија и негов прв претседател од 2002 до 2006 година и на Друштвото на писателите на Македонија.
За наградата, тој денеска, се заблагодари со милозвучни зборови и порача дека и натаму посветено ќе работи на темата која е негова инспирација и вредност, повеќе од една деценија.
Публицитет.мк
