Потсетувајќи се на оваа љубовна песна во еден од коментарите под песната на Јутуб прочитав еден коментар од само една реченица:„Кога љубовните песни беа навистина љубовни песни“.Оваа реченица ,претпоставувам,дека сигурно ја напишал некој повозрасен љубител на музика од причина што песната е од постар датум (1965) а и мислењето за нејзината убавина би ја изрекол некој кој памети некои други времиња кога љубовните песни навистина беа поинакви.
Дури и самиот наслов на песната „Сенката на твојата насмевка“ има нешто љубовно во себе. Музиката за оваа песна ја напишал композиторот Џони Мандел а текстот е дело на Пол Франсис Вебстер за потребите на филмот „Љубов на песок“ на режисерот Винсент Минели во кој настапуваат Елизабет Тејлор и Ричард Бартон.
Песната е воведна музичка тема во филмот која во соло изведба на труба ја исполнува Џек Шелдон а мелодијата провејува низ целиот филм за да на крајот биде изведена во хорска изведба.За квалитетот на песната говори и податокот дека таа го освои Оскарот во категоријата најдобра оригинална песна и тоа во годината кога меѓу номинираните песни беа и оние од филмовите „Што има ново маченце“ и „Шербурските чадори“.
Нејзината популарност ја зголеми и изведбата на Тони Бенет која ја освои наградата Греми за песна на годината во 1966 година.
Песната досега е испеана од голем број на мошне познати интерпретатори со што се потвредени нејзините квалитети. Таа може да се слушне и во изведба на :Барбра Стрејсенд, Енди Вилијамс, Боби Дарин, Џони Матис, Френк Синатра, Ненси Синатра, Енгелберт Хампердинк, Стиви Вондер…како и во многу инструментални изведби на најпознати инструменталисти и светски оркестри.
Потсетување на оваа прекрасна љубовна песна со изведбата на Енди Вилијамс која плени со неговиот извонреден глас.
Ѓ. Симјаноски, Публицитет.мк
