Преполни чаршии, кафулиња и рестораните, а се бара и кревет повеќе во хотелските и во кај приватните сместувачки капацитети. Слична е слика и на плажите. Охрид и Струга го живеат шпицот на туристичката сезона. Пред Илинденскиот викенд по традиција ги наполни двата езерски града.
Бројните ноќни забави, фестивали, музичко-сценски перформанси во овој период од годината дополнитечно ги привлекуваат вниманието на многубројните домашни и странски туристи кои, покрај тоа, уживаат и во природните убавини, културните знаменитости и чистата езерска вода на охридско-струшката ривиера. Покрај домашните, најбројни се туристите од соседството, Холанѓани, Полјаци, Турци, итн.
Но, јавната свест кај дел од нив е на ниско ниво. Тоа го покажува сликата која ја оставаат зад себе со купишта отпад, остатоци и амбалажа од храна и пијалоци. Екипите на јавните комунални претпријатија се постојано на терен, во три смени и со зголемен број вработени ги извршуваат работните задачи за чистење на јавните површини и одржување на хигиената.
„Зголемен е бројот на вработени кои извршуваат работни задачи во три смени, секојдневно се врши празнење на сите корпи за отпадоци од јавни површини, а зголемена е динамиката на празнење на контејнери со цела можна работна сила и расположлива механизација. Со оглед на тоа што во овој период е констатирана поголема гужва, поставени се поголем број контејнери и корпи за отпадоци посебно во централното градско подрачје и по езерскиот кеј“, информира јавното претпријатие „Охридски комуналец“.
Високите температури и големата гужва во градот ги зголеми повициите на Брзата помош. Со засилени тимови постојано интервенираат на колапси, инфаркти, но и пијани пациенти.
„Бројот на интервенции енормно е зголемен. Работиме со појачани тимови, а најчесто интервенираме на колапси, каснати од инсекти, инфаркти, инфузии, сообраќајни незгоди, како и на многу пијани, пред се млади лица. Најмладите алкохолизирани пациенти имаат само 16 години, а драстично е зголемен бројот и на Ковид позитивни“, изјави дежурниот доктор во Брзата помош за МИА.
За безбедноста во градот се грижи полицијата, со посебен фокус елиминирање на можностите за нарушување на јавниот ред и мир.
„Во пресрет на Илинденските празници, активностите на СВР Охрид ќе бидат насочени кон одржување на, и онака, стабилната безбедносна состојба на целото подрачје, со посебен фокус на јавниот ред и мир, пронаоѓање на сторители на кражби по плажи и домови и подигнување на безбедноста во сообраќајот и поставување сообраќајни пунктови на сите сообраќајници во градот, приградските и туристичките населби а посебно на авто патот во изградба Охрид-Кичево. Полициската станица за безбедност во патниот сообраќај Охрид, континуирано презема мерки за зголемување на безбедноста во сообраќајот“, изјави портпаролот на СВР Охрид, Стефан Димоски.
Извор: www.novatv.mk
