Во рамките на вторта вечер од манифестацијата „На зајдисонце“ во Трпејца синоќа беше промовиран првиот роман „Париска сложувалка“ од Анастасија Ристеска од Трпејца.
Таа од септември ќе биде деветто оделенка во ООУ „Св. Наум Охридски“ во Пештани а романот го напишала на англиски уште кога била во петто одделение.
Издавач е НУ Библиотека „Григор Прличев“ од Охрид а уредник на изданието е м-р Милчо Јованоски.
Рецензентот и промотор д-р Габриела Неделкоска синоќа пред публиката рече:
-Иако, жанрот на оваа книга цели кон младата популација на љубители на забавни мистерии во романтични градови, наративот длабоко ме навлече. Овој текст претставува импресивно достигнување со креативност, остроумност и убедливо раскажување особено кога се има предвид возраста на младата авторка. Текстот изобилува со хумор, исчекување и мистерија манифестирани преку привлечен и оригинален глас, младешки и умен. За некој толку млад, авторката покажува исклучителна зрелост и при конструирањето за заплетот, но и при развивањето на ликовите. Ритамот е импресивен, сцените течно се прелеваат, а паралелно се задржува младешката зачуденост и љубопитност. Централната мистерија е добро конструирана, а врската со тајните релации на дедото на Александра со светот на тајните служби даваат богат слој од интриги во целата приказна. Анастасија има природна склоност за раскажување, одлично владее со исчекувањето, а нејзината смисла за хумор ќе ја долови секој читател. Со повеќе искуство и зрелост, таа со сигурност ќе прерасне во силен писател со уникатен глас, рече на промоцијата д-р Габриела Неделкоска.
Младата писателка Анастасија Ристеска на промоцијата накусо го раскажа и сижето на романот:
-Кога младата уметница Александра е испратена во Париз, на мисија да го најде исчезнатиот политичар, таа е втурната во град на тајни, мистерија и опасност. Со неколку шифрирани пораки и мрежа на ексцентрични локали пред себе, Александра мора да се снаоѓа низ кривулестите улици на Градот на светлината за да дојде до вистината. Но, како што се доближува до откривањето на исчезнатиот политичар, таа открива дека ништо не е како што се чини и дека сенките на Париз може да кријат повеќе од одговори. Со доза на хумор и око за детали, Александра открива пораки на најнеочекувани места, од гламурозни гала забави до градини полни со рози и се соочува со предизвици што не можела ни да ги замисли. Но, она што не знае е дека нејзиното истражување ќе ја доведе до откровенија што ќе и го изменат животот засекогаш.
Анастасија во својата белешка во романот напиша:
-Додека растев, бев заробена од мистериозните книги, оние што те држат во неизвесност сѐ до последната страница. Шерлок Холмс, со брилијантните заклучоци и Агата Кристи со заплетканите сложувалки отсекогаш ми биле омилениот придружник во дождливите попладниња. Преку нивните приказни се вљубив во жанрот и сонував сама да напишам една приказна. Париз, особено, секогаш ми била дестинација од соништата. Помислата да лутам по историските улици, да истражувам тајни катчиња и да ја впивам неговата магична култура е мојот постојан извор на инспирација. Иако, сѐ уште не сум била таму, пишувајќи ја приказнава, на свој начин си го исполнив сонот. Кој знае? Можеби еден ден следната приказна ќе ја пишувам во удобно, мало кафуле во Париз, пиејќи кафе со млеко и гледајќи го градот кој оживува околу мене. До тогаш, merci beaucoup for reading, and à bientôt!
Вечерта во Трпејца со својот симпатичен настап ја збогати таначарската група составена од девочиа од Трпејца и девочиња кои одмораат тука.
Публицитет.мк
