Разговорот на минување во „Аквариус“ со Јордан Коцевски од Охрид има свој повод.
Во четврток на 23 февруари од 19 часот во Центарот за култура „Григор Прличев“ во Охрид ќе се одржи првата од трите промоции во серија на стрип албумот „Витези од соседството“ од авторскиот тим Јордан Коцевски и Дарко Богданов во издание на издавачката куќа „ Стрип Квадрат“
Јордан е автор на сценариото а Дарко, кои заеднички соработуваат подолго време и имаат и наградени дела е тој што го црта напишаното.
Со Јордан Коцевски разговара Милчо Јованоски – со клик на линкот слушнете го интервјуто во целост
-Графичката новела „Витези од соседството“ опфаќа урбани приказни обработени во ноар стил, во кои јунаците не се супер херои, туку обични луѓе „од соседството“ на кои им се случуваат необични ситуации кои би можеле на секого да му се случат. Како тие ќе се справат со нив, и дали ќе испаднат херои, ќе дознаете на 48-те страници од овој стрип албум, вели за Публицитет.мк Јордан Коцески.
Со Јордан сосема лежерно разговаравме за неговиот пат во светот на пишувањето од првиот роман „Време за живеење“ објавен пред 17 години, за тоа како започна да пишува, како ги создава расказите и популарните облачиња на стриповите, за времето минато во детската редакција на Радио Охрид, магистрирањето и одбранетиот докторат на тема сврзана со етно – храната.
Оставивме простор и за семејството, веселото друштво – првоодделенецот и бебето од само една година, сопругата и помислата да оцениме сами кому му е потешко во овие слатки маки, нему или нејзе. Бевме и многу сериозни кога говоревме за состојбите со стрип културата во Македонија, тешкотиите да се објави создаденото, ама и за желбите и плановите кои упорниот Јордан без сомнение ќе ги оствари.
Повеќе слушнете во аудиото,а од нас само потсетувањето дека промотивниот караван на „Витезите“ започнува во четврток во Охрид, продолжува во Виница во петок, и на крај завршува во сабота во Скопје, во Кафе Ли. Повелете на дружба со издавачката куќа Стрип Квадрат, како и со авторите кои ќе бидат цело време присутни и ќе пишуваат (а богами и цртаат) посвети.
Публицитет.мк
