Според верскиот календар на Македонската православна црква денеска верниците го одбележаа денот на Свети пророк Илија – Илинден.
Св. Илија (Громовникот) е еден од култните свеци кај православните Mакедонци, бидејки православната црква го има поистоветено со Перун Громовникот, од словенската митологија, кога вршела покрстување на Словените. Култот кон Перун бил широко развиен кај македонските Словени, па така тие го замениле своето омилено божество со христијанскиот светец. Овој култ кон Перун/Илија, и денес е присутен кај македонците.
Св. Илија бил боговидец, чудотворец, ревнител за Божјата вера. Бил родум од племето Ароново, од градот Тесвит и затоа е наречен Тесвитјанин. Кога се родил Илија, неговиот татко Савах видел ангели Божји околу детето како го повиваат во оган и му даваат да јаде пламен. Тоа било предзнак за неговиот пламенен карактер и за богодаруваната огнена сила во него. Целата своја младост ја минал во богомислие и во молитва, повлекувајќи се често во пустината за во тишина да размислува и да се моли. Се смета дека пред крајот на светот, Илија повторно ќе се јави за да ја сотре силата на Антихристот.
Низ Македонија има многу цркви и манстири кои го чуваат култот на Св. Пророк Илија. Денот свечено се одбележуваше насекаде низ земјата.
Фотографиите кои ги објавуваме се направени денеска околу 14 часот во црквата Свети Илија во селото Косел.
Според податоците до кои дојде „Публицитет.мк“ камен-темелникот на црквата е осветен и поставен на 14 мај 1989 година, а осветена е на 1 августI 2000 година од страна на Митрополитот Дебарско-кичевски г. Тимотеј. Фрескоживописот е дело на уметникот Тони Милцов од Охрид.
Во Ксел и уште неколку места низ Општина Охрид а и во цела Македонија, Св. Илија е селска слава, а сите кои го носат името Илија вечерва даваат именден.
„Публицитет.мк“
