По повод одбележувањето на 1000 години од упокојувањето на свети Јован Владимир, Црногорската академија на науките и уметностите во соработка со Македонската академија нанауките и уметностите, Академијата на науките на Албанија и Бугарската академија на науките организираше научна конференција „1000 годишнина на свети Јован Владимир“ која се одржа на 21-22 октомври 2016 година во просториите на Црногорската академија на науките и уметностите во Подгорица.
Од Македонија учествуваа тројца претставници. Виктор Недески како претставник на Македонската православна црква и Центарот за проучување на културното наследство на Македонската академија на науките и уметностите се претстави со темата: Нови откритија во елинофоната хагиографска и химнографска традиција за свети Јован Владимир.
Сашо Цветкоски како претставник на центарот за проучување на културното наследство на Македонската академија на науките и уметностите ја презентираше темата: Свети Јован Владимир – нов Константин и нов Евстатиј Плакида, а Милан Бошкоски како претставник на Институтот за национална историја на Македонија зборуваше за односите на кнезот Владимир со царот Самоил, Гаврил Радомир и Јован Владислав.
На конференцијата учествуваа и други угледни научници, истражувачи и книжевници од Црна Гора, Албанија и Бугарија кои заедно со нашите претставници имаа можност да споделат значајни сознанија и искуства за ликот и делото на светиот крал Јован Владимир, кој како што заклучија е заеднички и ги обединува сите овие земји и култури.
По конференцијата беше организирана екскурзија до местата во Црна Гора и Албанија кои се поврзани со животот и култот на светиот крал.
Публицитет.мк
