Пред две години новинарката Валентина Неловска ја издаде првата книга „Сага за Охрид “ која читателите добро ја прифатија.
Тоа значи дека историските телевизиски прилози обработени во проза наидоа на добар прием во јавноста. Затоа, Неловска се одлучи да објави и преработи дел од другите телевизиски емисии на кои е автор и уредник 15 сезони за ТВМ Телевизија во посебен дел.
-Сториите се веќе објавени под ист наслов , како и првиот „Сага за Охрид 2“. Со второто продолжение на книгата „Сага за Охрид “ се збогатуваат уникатните и мошне содржајни стории за градот, но и пошироко како што се насловите посветени на Струга, струшките села Вишни и Глобочица, Дебрца. Преку тие текстови Неловска не воведува во вистински историски приказни, факти и реалности преку многубројните контакти со луѓе кои живеат во Охрид и регионот, а кои поседуваат многу богати историски материјали. Во книгата се поместени разни теми со различни мотиви економски, културни, историски кои се поврзани со животот на луѓето и семејствата, приложени со навидум „ситни“ приказни , но искрени историски вистини, вели рецензентот д-р Павле Митрески.
Охрид е центарот на мојата душа. Чекорам по неговите несовршени улици и сокаци опиена од неговата неповторлива убавина. Велат животот нема реприза, но за среќа го има минатото. Она време што било и поминало на кое повеќе, помалку или воопшто не се сеќаваме, е на тоа време се обидувам да ве потсетам преку „Сага за Охрид 2“, вели авторката Неловска и додава:
– Ви донесувам нови луѓе, места и настани кои се специфични за градот, но овој пат и од околината и ќе ве потсетам на минатото за длабоко да ги сочувате во срцата и сеќавањата. Оние по сентименталните, од запретаните жарчиња скриен оган, можеби ќе пуштат и по некоја солза. Тага за едно минато време во кое секој од нас оставил свој белег во живеењето на градот колку и да бил скромен.
Книгата е печатена во ПНВ Публикации – Скопје, автор на насловната страница е Ѓоко Симјаноски а издавач е НУ Библиотека „Григор Прличев“ од Охрид.
Наскоро во продолженија со дозвола на авторката Неловска на нашиот Публицитет.мк ќе можете да прочитате неколку наслови од книгата која е веќе во продажба во книжарницата „Просвета“ во Охрид.
Публицитет.мк
