Пред една недела во присуство на бројна публика беше промовирано најновото дело на д-р Томислав Тунтев „Охрид – љуѓе и марифети“. Оваа книга задолжително треба да ја има секое семејство од Охрид кое е емотивно поврзано со градот , особено со стариот дел Варош.
Од низата приказни д-р Тунтев на наше барање ни отстапи три – една по една ќе ги објавуваме на Публицитет.мк
„Охрид – љуѓе и марифети“ може да се купи во книжарницата Просвета во Охрид.
ЗА ЖИВОТ, ЗА ЗДРАВЈЕ
Анџ‘к папса горешчината и дувна тро стрмче, ме фати некој уфунет дома и се кандисав да слезам нáјзеро, да се иск‘пам на акшам. Ептен ми е ујгун налето да се пљаснам вóјзеро на С‘р‘јшче, да напрам една бана пред куќа, така ко ќе ми текнит, од апансас, оттука тука. Не ут ладит веќе водана, ама бериќaтврсан, убо е ко ќе испливат чоек до Св. Јон Крстон – ќе зејш тро нефес од горешчиниве, та башка е после то авата. Кладов гашчина и терлаци, и ќинисав надвор, да фтасам на зајдисонце. Ги чактисав комшѝне на џишчено во кафичон к‘ј Санана к‘ј шо пиет кафе, и ај реков, да ги сајдисам. Се токосав со сите, напрајв тро алашвериш, шóпрајш како си, и фативме банана-љољољо муабети. Калабaлак имаше на С‘р‘јшче, авра од љуѓе, џубá-џуба, игла да немат к‘ј дáфрљиш. Една група туристи од Турција ја имаше сардисано цела тераса, курдисани сите по масите, едно столче фазла не остана, да немаш г‘с к‘ј дáклајш, кафето нáџишче го пијавме.
К‘ј кошон паралдисвеја дечишчана од малава, а-у, а-у, умот да ти се зејт. Никако да анл‘јсет дек љуѓево овде се дојдени да ужѝвет, и мир сакет, спокóјство. Абре, ко за инет буфтаја со таја лопката, коџá коландерисвена, се пулеше оту душа ѝ имет истаено. Бам бум, бам бум, по тој кошот, аздисаја, сафриве ми ги кренаја. Пак шуќур, изгледа калдисаја некое време, папсаја од трчајне, им збоктиса играјнето, та фатија џенем негде. Разбирам јас спортој мортој, ама овје дечишчава денес ни срам ни намус немет. К‘ј смеевме ре ние вака порано да буфтаме со лопка на порýчек, да ги прајме беузур љуѓето, ам ќе не скапаја од ќотек дома. Се знаеше ред, сега кучето стопанот не си гóзнајт.
И тамáм тихна ѓурултијата, и си рековме се ратисавме од галáма, ко ето ги, од потемници се вдадоја едни млади Енглези, туристи, од оние шо идет со аеропланине, ама камејна пијани. Сите, и м‘шки и женски, убо беа џорнати, лајна беа напраени. Викаја, пееја, врескаја ко орјати, бичим Охрид го имет ослободено. Галиба сумија к‘ј се, видоја љуѓе вóвода, та се стрчаја ко шашардисани сите да скокет клопче вóјзеро од плочана, ко вода да не виделе. Тие љуѓето билим, шо лежеја тука нáризи, се сашчисаја сите, ојљуле ги напраја. На сите пљачките живáвода им беа. Ние се сак‘лдисавме дан се испоудáет Енглезиве, ко шо беа сторени, та кој ќе пулит сејрој после, полиции, молиции, брзи помошти, ѓаоли, врази. Им свикавме тро, да не качерѝсвет ногу, со усул да се к‘пет, да клает тро дикат, безбели пуљет оту не се сами. Ама, младóјна – ич маслат не нè напраја – скокаја, се фрљаја, далдисвеја, батисвеја, се кафкалеја, си праеја ќејф на душата.
Колку шо ги пизмефме, толку им блаѕесфевме. Ни се врати филмот во глајве, си спомнавме шо значит младост – лудост. Та шо, и да напрáет тро џумбус, голема работа, не ќе ни се сронит бисерот. Не чинит да си нопак, пушчи ги љуѓето, млади се, дошле да трошет пари, да си се провéдет убо, нек му се изнаужѝвет на животот. Та и дечишчана наши шо буфтет по кошон, остáј ги нек паралдѝсвет дур может. Нек си бидет деца со сите шертој дур ги остават животот да си бидет деца. Убо е дур се сноет дечина во малана, имат надеж за сите, дек немат да зјапет празни куќишчана ко ќе нè немат нас еден ден.
И ко шо бевме така клапуносани, одма кренавме уши, ко норој. Не нѝтребит ногу да се кандисаме, ето ти себап од нигде-никаде, да се напијаме сите по една ракија, и да си наздравиме. Знаев оту ќе бајалдисаме пред к‘пејне, и оту ќе ја врзиме глата, ама се рашенлејсавме. После то, на терасана к‘ј Кате цело ѓезме напрáјфме. Ни се даде с‘р‘ за кутлама – за живот, за здравје. А вóјзеро… ќе се џитниме на акшам ко ќе паднит сл‘нцено, ќе папсат дотогаш и стрмчево, тепсија ќе е водана.
А и Св. Јон Крстон, нигде не ќе избегат.
Ај, наздрáвје!
Фото: Фејсбук група ОХРИД СЛИКИ ОД МИНАТОТО
Публицитет.мк
