На 73 годишна возраст денеска почина митрополитот Дебарско-кичевски г. Тимотеј.
Владиката Тимотеј починал во болница во Скопје каде што бил хоспитализиран пред неколку денови поради проблеми со срцето.
Тој е роден во 1951 година во Младо Нагоричане, кумановско, со световно име Славе Јовановски. Со Дебарско-кичевската епархија раководи од 1995 година. За архиереј на МПЦ-ОА е избран во 1981 година.
Со длабока тага во срцата и со смирение пред волјата Божја, Свештена Бигорската Обител ја доби веста за упокојувањето во Господа на нашиот сакан и возљубен Митрополит дедо Тимотеј, објави Бигорскиот манастир.
-Целото братство на Бигорскиот манастир, на чело со нашиот Старец и Игумен, Епископот Антаниски г. Партениј, со синовска љубов изразува искрено сочувство до целото свештенство, монаштво и верниот народ на Епархијата, како и до сите кои го познаваа и го љубеа нашиот Митрополит. Молитвите кон Господа во нашите срца сега се насочени за упокојување на неговата душа во вечните дворови на праведниците. Добриот наш Бог нека го удостои со Царството Небесно и со учество во вечната радост на светлината Христова. Вечен спомен и добар Ти Рај, сакан наш архипастиру, стои во објавата.
Со љубов, молитви и вечна благодарност „те испраќаат во Христовите прегратки Твоите духовни синови и внуци, твоите монаси и монахињи од Бигорски, Рајчица, Пречиста и Кнежино“, се наведува во објавата.
Се нагласува дека Митрополитот Тимотеј ќе остане запаметен како монахољубив пастир, со чиј благослов и пастирска слобода и грижа се возобнови и зацврсти монаштвото во нашата богочувана епархија. Неговата љубов кон монаштвото и кон црковниот клир, човечноста и расудувањето што ги пројавуваше во секоја клучна ситуација, беа вистински сведоштва на неговата духовна зрелост и вдахновена мудрост.
Публицитет.мк
