Во еден од најемотивните и значајни моменти за македонската дијаспора во северна Италија, во неделата кога се слави светата великомаченичка Злата Мегленска, во Трентино беше отслужена првата Света Божествена Литургија во новооснованиот храм. Овој духовен настан, организиран од МКД „Св. Кирил и Методиј – Трентино“, го означи официјалниот почеток на новата парохиска заедница на Македонската православна црква – Охридска Архиепископија во регионот Трентино Алто Адиџе.
Свештеникот отец Орце Пешов ја предводеше литургијата, а храмот беше исполнет со верници кои со молитва и причест го прославија овој длабоко симболичен ден.
„Нека оваа нова парохија биде извор на благодат, љубов и духовно единство за сите нејзини членови,“ се вели во заедничката порака од отец Пешов и претседателот на друштвото, Венко Трпески.
Од печалбарски корени до духовен дом
Заедницата се потсети на своите основоположници — Зоран Долински, Никола Ѓергески, Фидан Чавкоски, Сашо Балоски и Владо Белкоски — кои во 1992 година го започнаа македонското присуство во Трентино. Нивната пожртвуваност и љубов кон татковината го трасираа патот за денешната духовна и културна заедница.
„Конечно го добивме нашиот духовен дом! со овие зборови, македонската заедница ја прослави реализацијата на долгогодишната желба за сопствено светилиште.
Претставниците на парохијата ги повикаа сите православни христијани од регионот кои се чувствуваат дел од Македонската православна црква – Охридска Архиепископија, да се приклучат кон новата заедница и да придонесат кон нејзиниот духовен и општествен раст.
Овој настан не е само верски чин — тој е симбол на истрајност, идентитет и заедништво. Македонскиот храм во Трентино сега стои како светилник на верата и културната гордост за сите генерации што доаѓа.
Публицитет.мк
