Охрид е преполн со туристи од земјава и странство од кои најголемиот број се припаднички на понежниот пол, кои 8 Март ќе го прослават во нашиот најголем туристички центар. Сончевиот ден придонесе уште повеќе да се почувствува раздвиженоста во чаршијата, долж градскиот кеј, рестораните и кафетериите во кои се организирани забави за славеничките …
Припаднички на понежниот пол од земјава и регионот го преплавија Охрид за тука да го прослават Меѓународниот ден на жената. Временските услови се прекрасни, а атмосферата е надополнета со мирисот на убавите цвеќиња кои се нудат на повеќе катчиња во градот, што предизвика воодушевување кај гостинките и се разбира кај охриѓанки.
„Слушнавме дека овде е многу убаво. Само што стигнавме и овој поглед не воодушеви. Преубаво е и ако некој не знае како изгледа поглед од милион долари, еве тоа е ова.“
„Прв пат сум во Охрид, многу ми се допаѓа и се надевам дека пак ќе дојдам. Природата ви е преубава, воздухот е чист, вие сте гостопримлив народ“-велат туристки од Србија.
„Последниве години е зголемен интересот на српските туристи за Охрид, особено за 7-дневните аранжмани во текот на летото. Се повеќе луѓе наместо во познатите туристички центри одбираат да летуваат тука, бидејќи високите температури таму се неподносливи, а Охрид покрај природните убавини нуди пријатни временски услови“, изјави Марија Кокот, туристички водич од Белград.
Хотелиерите се задоволни од посетеноста и очекуваат слично да биде за Велигденските и првомајските празници.
„8 Март како празник покажа високи резултати и голем интерес за туризмот, за Охрид и тоа е предзнак дека и понатака за Велигденските празници, за туристичката сезона очекуваме голем интерес и мислам дека 80-90 посто уште сега се закупени хотелските аранжмани“, изјави Љупчо Цветаноски-сопственик на хотел.
„Имаме гости од САД, од Шпанија, Балканот: Словенија, Хрватска, Србија, Грција и нормално наши гости. Исто така имаме доста најави кои се за Велигден и за 1 Мај“, изјави Марио Пердулоски-менаџер на хотел.
Хотелиерите, но и експертите најавуваат подобра туристичка сезона од лани која се вбројува помеѓу најуспешните.
Овој празничен викенд ги исполни очекувањата. Останува да видиме дали нивните прогнози ќе се остварат во останатиот дел од годината.
Извор: www.mrt.com.mk
Сашо Нелоски
Публицитет.мк
