Со самото започнување на Европското првенство во фудбал, започна и еуфоријата на сите фудбалски фанови.
Фановите се најчесто припадниците на машкиот род, но колку овој најчесто стереотипен став е вистинит? Затоа, ние од Публицитет.мк одлучивме да направиме мала анкета меѓу припадничките на понежниот пол на следните прашања:
- Дали гледате Европско првентство во фудбал? Ако да, зошто и ако не, зошто?
- Ако не сте голем фан на фудбал и не гледате, што правите додека вашите момчиња/ машки пријатели/ машки членови на семејството гледаат фудбал?
- Кој тим сакате да победи на ова првенство?
А, ова беа нивните одговори:
Андреа, 21: Повремено знам да го вклучам телевизирот и во позадина да го слушам коментаторот како се одвива натпреварот. Ми одзема внимание и ако имам време би сакала да погледнам барем дел од некој натпревар. Не сум голем фан во фудбал, но одвреме на време со друштво со задоволство би следела некој натпревар. Немам посебен тим за победа, ќе видиме во наредниот период можеби ќе се најдам пред екранот навивајќи за некој тим.
Стефанија, 20: Не гледам, мислам дека фудбалот е здодевен спорт иако тоа не е популарно мислење. Не ми пречи, секој може да гледа што сака па и фудбал. Оваа година сакам да победи Германија.
Ана, 20: Не ги следам сите натпревари, но сепак сакам да го гледам Европското првенство заедно со моето семејство, кое многу сака спорт. И покрај тоа што не припаѓам на машкиот пол, сепак го сакам фудбалот. Сметам дека фудбалот не е само машки спорт, па ако некој од моите пријатели гледаат фудбал јас би им се приклучила. Како и секое Европско така и ова навивам Шпанија да биде победник.
Марија,22: Не затоа што никогаш не сум била особено заинтересирана за фудбалот, или некој спорт воопшто. Додека тие гледаат фудбал јас гледам youtubers на лаптопот или доколку сме излезени скролам на Фејсбук и другите социјални мрежи како Твитер и Инстаграм. Нека победи најдобриот.
Лора, 18: Не гледам, не ме интересира воопшто, кога бев помала гледав за да бидам во тек и за да сум “кул”, но сега сфатив дека побрзо би гледала нешто што е светско, а е од мое поле на интерес на пример Евровизија. Како прво, многу е сексистичко прашањето. Како би одговорила кога имам другарка која е поголем фан на фудбалот од сите машки личности што ги знам. Со неа не знам како би се справила кога таа воопшто не ни излегува за време на натпреварите, но тоа е во ред затоа што и јас кога имаше Евровизија го правев истото и ги почитувам туѓите интереси. А, ако мора да дадам одговор за момчето и машките личности во мојот живот немам проблеми со тоа, затоа што момчето(фала му на бога) не е фан на фудбалот и затоа не мора да мислам кога има натпревари и кој победил, кој играл. Додека татко ми и дедо ми понекогаш гледаат, но не се фанатици како мојата другарка. Хахахаха, ако мора да одговорам ќе речам Германија затоа што само за нив знам дека отсекогаш добро играле.
Маги, 19: Не гледам фудбал, зашто не сум љубител на гледањето фудбал туку играње. Но, додека моето машко друштво гледа фудбал јас секогаш им се придружувам, зашто кадешто е забавата, таму сум и јас. Сакам да победи Шпанија, зашто сите мои другари навиваат за шпанскиот тип.
Магдалена, 18: Јас главно следам само некои натпревари. Од мала сакам да гледам фудбал со мојот татко. Оваа година сакам титулата да ја земе Португалија.
Симона, 19: Го гледам Европското првенство, заради забава и бидејќи е интересно. Јас сум голем фудбалски фан и често гледам фудбал со моите другари. Оваа година сакам да победи тимот на Белгија.
Вера, 18: Не следам редовно, но гледам заедно со моите другари и навивам со нив. Фаворит ми е Шпанија.
Александра, 21: Не гледам фудбал, само затоа што моментално учам, а и спортовите не ми претставуваат забава. Додека мојата фамилија гледа фудбал јас најчесто учам или слушам музика. Немам фаворит.
А, вие драги читатели? Дали и вие сте фудбалски фан? Кој е вашиот фаворит за оваа година. Како и да е, нека победи најдобриот!
Дамјана Видическа, Публицитет.мк