Денес е Бадник или Коледе, денот предвесник на најголемиот христијански празник-Божиќ.
Бадник или Коледе — денот пред роденденот на Исус Христос (Божиќ), според христијанската традиција. Според Јулијанскиот календар, по кој се раководи Македонската православна црква, Бадник паѓа на 6 јануари секоја година, а Божиќ на 7 јануари. Суштината на празникот е во радоста на христијаните пред големиот ден — Христовото раѓање. Истовремено, со овој ден завршуваат и Божиќните пости.
Традиционално, Бадник се прославува кај сите христијани, но црквите кои го користат Грегоријанскиот календар го прославуваат на 24 декември. Кај сите христијански народи има низа обичаи за Бадник, особено поврзани со Бадниковата вечера.
Дел од традицијата е внесувањето на бадниковото гранче во домот, како и богатата посна трпеза, која според обичаите, не се раскренува и се остава да преноќи бидејќи се верува дека Господ ќе дојде на вечера.
Со старата коледарска песна „Вечниот бог”, младите бадникарчиња во Охрид денеска по седми пат ќе ја објават радосната вест за раѓањето на Исус. Радосната вест ќе ја најават и коледарчињата одејќи од врата на врата кај своите сограѓани.
Публицитет.мк
