Македонските иселеници во повеќе градови во САД, Австралија и Европа викендов протестираа против преговорите за промена на името со Грција. Иселениците бараат прекин на преговорите.
Десетици илјади македонски иселеници протестираа во Австралија против промена на уставното име. Се протестираше во Мелбурн, Сиднеј и Перт. Во САД, иселениците протестираа во Вашингтон каде се бараше прекин на преговорите со Грција.
Демонстрантите во Австралија им порачаа на премиерот Зоран Заев, министерот за надворешни работи Никола Димитров и на министерката за одбрана Радмила Шекеринска дека ќе бидат прогласени за „персона нон грата“ во Австралија доколку се промени името.
Дел од учесниците на протестот ја запалија и сликата на Заев.
Иселениците од глобалното непартиско движење изразија гласност против промена на името и побараа прекин на преговорите
Над 500-тини македонски иселеници излегоа на протест за прекин на преговорите за името и демонстрираа по Националното шеталиште во Вашингтон.
![](https://publicitet.mk/wp-content/uploads/2018/03/gdb.voanews.com_A1979B8E-02A6-4E12-8491-4775B1660621_cx3_cy13_cw97_w650_r1_s.jpg)
Протестот под мотото “Ние сме Македонија” (#WeAreMacedonia), како што наведе ова глобално непартиско движење, а чиј координатор е Обединетата македонска дијаспора (ОМД), има цел да се покаже гласност за одбраната на името на државата и идентитетот на нацијата, но и повик до актуелната американска администрација да ја подобри политиката кон Македонија.
![](https://publicitet.mk/wp-content/uploads/2018/03/gdb.voanews.com_AC8BDF96-7411-4B87-9ACF-1D6CEA09A349_w650_r1_s.jpg)
Протестот започна точно на пладне по локално време во Вашингтон. Собирно место беше на Националното шеталиште меѓу улиците Џеферсон и Медисон, недалеку од Конгресот.
Присутните носеа македонски народни обележја, за да ја изразат, како што велат, македонската посебност, вклучувајќи го и 16-зрачното златно-жолто сонце од Кутлеш и златно-жолтиот двоопаш лав со круна на глава на црвена основа.
![](https://publicitet.mk/wp-content/uploads/2018/03/gdb.voanews.com_BF965B2E-0BE1-49E2-B906-3336F18DFC62_w650_r1_s.jpg)
Слични протести со мотото “Ние сме Македонија” имаше во Њујорк, Чикаго, Торонто и Детроит.
Претходно, и Светскиот Македонски Конгрес ги осуди сите обиди за промена на државното име Македонија и на македонскиот идентитет. „Името и идентитетот не cе предмет на распродажба, трговија и преговори и македонскиот народ никогаш нема да се согласи тие да бидат променети“, обелоденија од СМК.
Оттаму повикаа дека „името Македонија е наследство од нашите претци и света обврска и должност е Македонија да им ја оставиме на идните генерации со истото име и македонскиот идентитет што ние сме ги наследиле“.
Од друга страна, заедницата на иселениците, „Форумот за демократска Македонија“, ја поздрави иницијативата за решавање на проблемот со името, што е главна пречка за интеграција во ЕУ и НАТО структурите. „Неодамнешната посета на медијаторот Метју Нимиц на Македонија, како и неодамнешната средба на премиерот Зоран Заев со неговиот грчки колега Алексис Ципрас во Давос, се силен импулс за конструктивни разговори кои би воделе кон достоинствено и прифатливо решение на овој повеќедецениски спор“, коментираа од оваа организација на македонските иселеници.
Мирни протести Македонците одржаа и низ Европа. Фотографиите кои следат покажуваат како Македонците во Прага – Чешка бараат непроменливост на уставното име на Република Македонија.
Извор: Прилогот е компилација од објавите на светските сервиси на македонски јазик: DW, SBS и VOA
Публицитет.мк