Охрид ги дочека гостите во сообраќаен хаос, раскопани улици, блокирани улици, тротоари, пешачки и велосипедски патеки. Урбаната опрема повторно поставена насекаде низ градот без никаков ред. Ништо од пријатно место за прошетка и одмор на туристите и граѓаните, обвинија денеска на прес-конференција во ОК на ВМРО-ДПМНЕ Охрид.
Како што рече претседателот на Охридскиот комитет на оваа партија, Сашо Донев, улиците и позначајните сообраќајници низ градот и понатаму се во катастрофална состојба, а СДСМ и Георгиески за неколку гласови асфалтираат тесни улички и приватни сокачиња.
-Нефункционирањето на рампите во центарот на Охрид само ја потврдува погрешната политика на локалната власт мислејќи дека ќе го намалат револтот на граѓаните со тоа што рампите стојат кренати токму во кампањата за локалните избори.Дали СДСМ и Георгиески одговорно го слушаат и го разбираат крикот за чист воздух со исечените здрави дрва кај музичкото училиште „Методи Патчев“?Беззаконието го гледаме на секој чекор, а надлежните се немоќни и не можат да се справат исто како што не можат да воведат ред со дивоградбите. Власта мора да понесе одговорност за сите овие неправди кон граѓаните, рече Донев.
Тој додаде дека Охрид е многу повеќе од лагите и неостварени ветувања на СДСМ.
-На Охрид му треба градоначалник кој ќе ги решава секојдневните проблеми на граѓаните. Охриѓани знаат како да се однесуваат кон оние кои имаат респект кон нив, а како кон оние кои ниту ги почитуваат, ниту ги штитат туку ја потценуваат нивната интелигенција, изјави претседателот на Општинскиот комитет на ВМРО-ДПМНЕ во Охрид, Сашо Донев.
Публицитет.мк
