„Ирис“ од Струга неодамна ја издаде збирката раскази „Глува река“ од Анастас Ќушкоски од Вевчани.
-Моите посериозни обиди на литературен план беа токму со појавата на прозниот текст „Извор и краста“ во далечната 1978 година од него подоцна произлезе и истоимената драма.
Најновата книгата содржи 17 раскази поделени во два дела. Во првиот дел се расказите кои се притоки на една „Глува река“ чиј источник е во длабините на бигорните карпи на човековата душа, а свој залезник има во океанот на тишината. Вториот дел се мои кратки раскази со универзална тематика, таканаречени „Трагијатури за филм и пијано.Овие продуховени скици ја отсликуваат апсурдноста со која човекот се соочува во својот врамен тек на современиот живот, изјави авторот за „Публицитет.мк“
Збирката раскази е збогатена со фотографски записи од фототеката на авторот, нераскинливо поврзани со тематската содржина.
Анастас Ќушкоски е роден 1942 година во Вевчани и има завршено Економски факултет. Тој е еден од ретките поливалентни автори со комплексно и разновидно творештво. За него не постојат граници во уметничкото изразување . Во јавноста е познат како драмски автор,поет, раскажувач, истражувач,публицист, сценарист, режисер и пасиониран фотограф. Зад него се петанесет книги од кои дел во себе содржат научно – истражувачко творештво сврзано со печалбарството, светилиштата и лингвистиката во неговата постојана инспирација родното Вевчани.
Ќушкоски е член на повеќе асоцијации и здруженија меѓу кои и на Друштвото на писателите на Македонија. За одделни проекти е добитник на повеќе награди и признанија.
М. Јованоски / Публицитет.мк