Температурите се движат кон 40-тиот степен, па не треба да не чуди што многумина не се чувствуваат добро. И додека надлежните им порачуваат на граѓаните да останат во постудена просторија и да пијат многу течности, ние ви посочуваме на кои симптоми треба да обрнете внимание доколку се посомневате дека сте добиле топлотен удар.
Симптоми на топлотен удар и прва помош
Со излегувањето на сонце ризикувате да доживете топлотен удар, состојба која се појавува како последица на неможноста на телото да ја контролира својата температура. Тогаш се лачи повеќе пот, телото не може да се разлади и температурата во рок од само 10 – 15 минути може да порасне и до 41 степен.
Првите симптоми на топлотен удар се високата температура која преминува 40 степени, црвена, топла и сува кожа, забрзан пулс, пулсирачка главоболка, вртоглавица, мачнина, збунетост и омалаксаност. Веќе кога ќе ги почувствувате овие први симптоми, треба да побарате постудена просторија каде ќе се засолните, а треба да седнете во полуседечка положба, малку да ја откопчате облеката и по некое време телото и главата да ги навлажните со млака вода и да повикате доктор.
Исто така, ако долго време бидете изложени на топло, потењето постојано се зголемува, а доколку не ги надоместите изгубените течности и електролити, може да се појави вртоглавица, главоболка, мачнина, грчеви, треперење, дишењето се забрзува, а кожата почнува прекумерно да се поти и да станува ладна. Тоа се симптомите на топлинска исцрпеност. Лицето кое ќе се пожали на овие симптоми, треба веднаш да се смести во постудена просторија и да пие повеќе течности без алкохол или пак кофеин.
Извор: Убавина и здравје.мк
