Во организација на здружението на граѓани СТАР Скопје – прво здружение на Балканот кое промовира унапредување и промоција на правата на сексуалните работници во Р. Македонија, од 15-17 aприл во Маврово се одржа тренинг за ,,Унапредување на модели и практики во социјалниот систем“ наменет за социјални работници од Меѓу-општински центар за социјална работа на град Скопје.
Јулијана Настоска од „Опција“ Охрид заедно со социјален работник од ХОПС „Опции за здрав живот“ Скопје и еден претставник од СТАР, беше поканета да биде дел од тимот кој го фасилитираше тренингот.
Во текот на едукативни сесии, учесниците беа детално запознаети со историјата на трите организации кои меѓу себе имаат одлична соработка но и спроведено многу бројни активности за подобрување на статусот на маргинализираните групи во општеството. Во Маврово се дискутираше и за законската регулатива на сексуалната работа, проблемите и потребите на заедницата, улогата на социјалниот работник во работа со ранливи групи и практично се работеше на две студии на случај.
-Она што на крај како фидбек го добивме од тренингот беше мотивот и интересот на социјалните работници да навлезат во проблематика која ја третираме како организации. Тие како професионалци ја потенцираа важната улога на граѓанскиот сектор во општеството како една значајна алка која е неопходна за подобрување на социјалната средина. Сето тоа само го става акцентот од потребата за одржување на овие хумани политики и после 2016 година кога си заминува донаторот од земјава со една крајна цел а тоа е унапредување и градење на едно здраво и толерантно општество, вели Јулијана Настоска за Публицитет.мк
Јулијана Настоска веќе 10 години е социјален работник во здружение на граѓани „Опција“- Охрид кое работи на два проекти: Програма за намалување на штети од употреба на дрога (со корисници на дрога) и Програма за поддршка на сексуални работници и нивни семејства на територија на Охрид и Струга. Сите активности кои тимот ги спроведува се финансиски помогнати од донаторот Глобал Фонд од Женева – проект за борба против ХИВ/СИДА, Туберкулоза и Маларија а под супервизија на Министерство за здравство на Република Македонија.
Публицитет.мк
