Во едни, други малку подалечни времиња или како што велат старите – понапред во Охрид постоеше групата „Канео“ .
Покојниот Љупчо Шурбаноски, вокал и неговите другари Борис Гаврилоски и Сашо Видоски на почетокот од деведесеттите години , решија и ја возобновија групата, која првпат под ова име се формирала во далечната 1967 година.
-Почнавме во времето кога некои од нас завршувавме основно образование. На матинеата и игранките,а подоцна и по ресторантите и хотелите изведувавме пред се’ туѓа музика. Постепено почнавме и да компонираме за себе . Едно време секој тргна на своја страна. Патиштата ни се раздвоија, за подоцна кон крајот на осумдесеттите од минатиот век повторно дел од нас да се собереме и да продолжиме каде што застанавме, вели за Публицитет.мк наставникот по музика и член на оваа некогаш популарна група Борис Гаврилоски.
Во погоре споменатата формација тие ја издадоа и првата и единствена аудио касета под наслов „Мала девојка “ во продукција на Македонската радио-телевизија во која Шурбаноски работеше како снимател во Дописниот центар во Охрид.
-Кам бекот ни беше повеќе од успешен дури направивме и промотивен концерт во Охрид. Настапивме неколку пати на МТВ во тогаш популарната „Шоуто мора да продолжи“ и во неколку други емисии. Претходно во битолската ТВ ТЕРА направивме неколку спотови за песните од албумот, додава Гаврилоски.
Групата „Канео“ во 1994 настапи на „Макефест“ со композицијата „ Пак ќе дојдеш во Охрид“ дело на композиторот Методија Бараковски – Менде и на аранжерот Љупчо Константинов, исто од Охрид.
Овој запис кој ние од „Публицитет. мк “ се потрудивме да го пронајдеме е токму со таа песна која уште однапред знаеме ќе побуди големи емоции и лавина од спомени – пред се’ за нашиот колега Љупчо чиј глас многу наликуваше на гласот на Демис Русос, па тој било на англиски или македонски најчесто и со задоволство ги пееше неговите песни.
Борис Гаврилоски во интервјуто по овој повод – најавува скорешно по трет пат собирање на „Канео“ за некогашните другари да го доотсонуваат својот сон во музиката.
Милчо Јованоски, Публицитет.мк
