Новото издание на „Мојот живот, мојот свет“ е посветено на Вили Котовски.
Вили во мигов живее во Русија, во градот Саратов и информациите кои допираат до нас велат дека често настапува и таму.
Тој пред три години одбележа 30 години од неговиот естраден живот. Со концерт во својот Охрид од каде тргна неговата музичка приказна.
Токму за естрадата и музиката за легендарната група „Инфаркт“, потоа „Лара“ и солистичката кариера и настапите по фестивалите спроти концертот со Вили разговараше Милчо Јованоски. Во етерот, тогаш помина сосема кус дел од интервјуто, а другото еве сега му дојде редот да излезе во јавност и од богатата архива.
Преку неговите сеќавања заедно да се вратиме во едно друго романтично време кое остана неповратно зад сите нас.
Вили споменува многу драги лица од светот на музиката, соработниците…
Како и кога ја започнал својата кариера уште во поранешна Југославија? Во Загреб отпеал демо снимка, песна која подоцна се најде на репертоарот на култните „Прлљаво казалиште“.
Тој објаснува како беше да се биде рокер во тоа време, за неговите стихови во некогаш популарното списание „Двоје“
Вили зборува за големиот хит „Не те давам“ песна која и денес мнозина ја слушаат. Таа песна му ја одбележува кариерата, како печат, а нему му е најомилена заедно со „Македонија“ .
Ќе слушнете за првата плоча за Радио Охрид и подоцна за Југодиск, за плочата во тогашниот Советски сојуз од која како што вели и денес добива по некој авторски хонорар,а таму се дистрибуирала во за наши прилики во 200 000 примероци.
Ни кажа дека не е повеќе „бунтовник без причина“ за фестивалите и настапите и наградите, но и за неговото чедо „Канео фест“.
Зад Вили се три самостојни аудио касети и уште едно ЦД со избор негови песни промовирано, тогаш пред три години на 4 март, на денот на неговиот роденден.
Искрен како и секогаш, едноставен, Вили е жива музичка легенда на Охрид.
Сигурни сме има луѓе кои се сеќаваат на неговите настапи, свирки со групите, забавите.
Вили е човек кому музиката му е во крвта. Што и да работи, како и сите ние за живот, веруваме музиката тој не ја заборава и таму во Русија.
Со клик на линк слушнете аудио
Автор и водител: Милчо Јованоски
