Актерот Стрезо Стаматовски од Народниот театар Охрид се закити со наградата за најдобра епизодна улога на шестиот меѓународен фестивал на комедијата „Гола Месечина“ што се одржа изминатите денови во Скопје, во организација на НУ Театар „Комедија“.
Актерскиот ансамбл на Охридскиот народен театар на фестивалот ја изведе театарската претстава „Каде е пиштолот“ од Габор Ѓореј, а во режија на Дејана Николовска.
Министерот за култура Исмаили, во рамките на фестивалското доделување на наградите, ја додели наградата за најдобра претстава и најдобра режија на претставата „39 скалила“ на Загрепскиот театар на комедијата.
На последната фестивалска вечер беше изведена стендап-комедијата од охридскиот актер Никола Тодоровски, а премиерно беше прикажан и документарен филм за доајенот на македонската култура, големата актерка Анче Џамбазова, што го сними НУ Театар „Комедија“. Филмот, во кој се прикажани разни аспекти од животот и кариерата на Џамбазова е во режија на Миле Гроздановски, а по сценарио на Гоце Трајковски.
Публицитет.мк
